Ўзбекистон, Тошкент - Batafsil.uz. Сербия пойтахти Белградда муддатдан илгари ўтказиладиган парламент сайловлари арафасида мухолифат ҳамда талабалар ҳаракати тарафдорларининг минглаб кишилик оммавий намойиши бўлиб ўтди. Маълумотларига кўра, пойтахт кўчаларига чиққан 150 мингга яқин намойишчи 2014 йилдан бери мамлакатни бошқариб келаётган Александар Вучич ҳокимиятига чек қўйиш ва "Талабалар рўйхати" ҳаракатини қўллаб-қувватлашни талаб қилмоқда.
25 октябрга белгиланган муддатдан илгари парламент сайловлари мамлакатда деярли икки йилдан бери давом этаётган норозиликлар оқибатида ташкил этилган.
Оммавий норозиликларга 2024 йилнинг ноябрь ойида Нови-Сад темир йўл вокзалида реконструкциядан сўнг фойдаланишга топширилган бетон бостирманинг қулаб тушиши ва оқибатда 16 кишининг ҳалок бўлиши сабаб бўлган. Сербия мухолифати ва мустақил оммавий ахборот воситалари ушбу фожианинг асосий омили сифатида давлат тизимидаги коррупцияни кўрсатган.
Ҳодисадан сўнг бошланган намойишларнинг асосий ҳаракатлантирувчи кучига айланган талабалар сиёсий майдонда "Талабалар рўйхати" ҳаракатини шакллантирган.
Ушбу ҳаракатда ягона лидер мавжуд эмас ва номзодлар орасида профессионал сиёсатчилар ўрнига олимлар, фаоллар ҳамда жамоат арбоблари ўрин олган.
Сўнгги ижтимоий сўровномалар натижаларига кўра, "Талабалар рўйхати" ҳаракати Вучич раҳбарлик қилаётган Сербия прогрессив партиясидан (СПП) ўзиб кетиши мумкин. Шу сабабли асосий мухолиф кучлар ҳам сайлов пойгасидан чиқиб, ўз сайловчиларини талабалар ҳаракатини қўллаб-қувватлашга чақирмоқда.
Ўз навбатида, Александар Вучич президентлик лавозимидан истеъфо берганига қарамай, ҳокимиятни топширмоқчи эмас. У навбатдаги сайловлар орқали мамлакатнинг амалда кенгроқ ваколатларга эга бўлган Бош вазири лавозимини эгаллашни режалаштирмоқда.
Аввалроқ Францияда мактаб ўқувчилари ва талабаларнинг таълим шароитларидан норозилиги билан бошланган намойишлар яшаш харажатлари ошиши ва давлат хизматлари сифатининг пасайишига қарши кенг кўламли ҳаракатга айланганди. 17 октябрь куни мамлакатнинг турли шаҳарларида юз минглаб одамлар кўчага чиқди, айрим жойларда намойишлар тартибсизликлар, ёнғинлар ва полиция билан тўқнашувларга айланган эди. Президент Эммануэль Макрон 18 октябрь куни халққа мурожаат қилиб, зўравонликни қоралади ва норозилик иштирокчиларининг қонуний талабларини уларнинг жамоат тартибини бузган ҳаракатларидан ажратиш кераклигини таъкидлаган.
Изоҳлар мавжуд емас