Ўзбекистон, Тошкент - Batafsil.uz. Ўзбекистонда алиментни ҳисоблашга ёндашувни ўзгартириш таклиф қилинмоқда. Тўловларни ота-онанинг расмий даромадига боғлаш ўрнига, улар боланинг ёши ва уни боқиш учун зарур бўлган харажатларни ҳисобга олиш масаласи кўриб чиқилмоқда.
Бу ҳақда Бош вазир ўринбосари - Оила ва хотин-қизлар қўмитаси раиси Дилноза Каттахонова Сенатдаги муҳокамада маълум қилди.
Унинг сўзларига кўра, бугунги кунда баъзи ота-оналар ҳақиқий даромадларини атайлаб яширмоқда ёки алимент миқдорини камайтириш учун расман кам маошли ишга жойлашмоқда. Натижада бола кундалик харажатларини қоплашга ҳам етмайдиган маблағ олиши мумкин.
Ушбу муаммони ҳал қилиш учун болалар учун уларнинг ёш тоифасини ҳисобга олган ҳолда минимал истеъмол саватини белгилаш таклиф этилмоқда. Бунда алиментнинг энг кам миқдорини бундай саватнинг қийматидан келиб чиқиб ҳисоблаш режалаштирилмоқда.
Ҳозир алимент миқдори ота-онанинг даромадига боғлиқ. Бир бола учун иш ҳақининг чорак қисми, икки бола учун учдан бир қисми, уч ва ундан ортиқ бола учун эса даромаднинг ярми ундирилади.
Шу билан бирга, ҳар бир бола учун тўлов энг кам иш ҳақининг 26,5 фоизидан кам бўлиши мумкин эмас - ҳозир бу 360,4 минг сўмни ташкил этади.
Шундай қилиб, таклиф этилаётган ёндашувда алимент миқдори нафақат ота-онанинг расмий маоши, балки биринчи навбатда болани таъминлаш учун зарур харажатлар билан белгиланади.
Алимент ундириш механизмининг ўзини ҳам ўзгартириш таклиф этилмоқда. Каттахонованинг сўзларига кўра, тартиб-таомилларнинг бир қисмини халқаро тажрибани ҳисобга олган ҳолда босқичма-босқич хусусий секторга ўтказиш режалаштирилмоқда. Ҳозирда алимент ундириш билан асосан Мажбурий ижро бюроси шуғулланмоқда.
Эслатиб ўтамизки, аввалроқ Навоий вилояти Кармана туманида Мажбурий ижро бюроси ходимлари алимент тўлашдан яширинган эркакни тандир ичидан топганди.
Изоҳлар мавжуд емас