Ўзбекистон, Тошкент - Batafsil.uz. Ўзбекистон Республикаси Вазирлар Маҳкамасининг қарори билан жисмоний шахслар учун биологик фаол қўшимчаларни (БФҚ) божхона тўловларисиз олиб кириш тартиби соддалаштирилди. Янги қоидаларга кўра, эндиликда фуқаролар хориждан 3 килограммгача бўлган миқдордаги қўшимчаларни божсиз олиб ўтишлари мумкин.
Белгиланган тартибга асосан, жисмоний шахслар 10 турдаги БФҚларни бирламчи ўрамда (ҳар бир турдан бир донадан кўп бўлмаган миқдорда) олиб киришларига рухсат берилади. Бунда барча маҳсулотларнинг умумий вазни 3 килограммдан ошмаслиги лозим.
Илгари ушбу меъёрлар маҳсулотнинг шаклига қараб фарқланган. Хусусан, таблетка ёки капсула кўринишидаги қўшимчалар 100 донагача, кукун шаклидагилари эса 0,5 килограммгача чекланган эди. Агар бир ўрамдаги маҳсулот сони белгиланган лимитдан ортиқ бўлса, аниқ тартиб мавжуд эмаслиги амалиётда турли тушунмовчиликларни келтириб чиқараётган эди.
Янги ўзгаришлар соҳадаги ноаниқликларга чек қўйиш билан бирга, меъёрларни белгилашда аҳолининг таклиф ва эҳтиёжлари ҳам инобатга олингани билан аҳамиятлидир.
Бундан олдин Рақобатни ривожлантириш ва истеъмолчилар ҳуқуқларини ҳимоя қилиш қўмитаси фуқароларга биологик фаол қўшимчаларни эҳтиёткорлик билан танлаш муҳимлигини эслатганди. Қайд этилишича, шикоятлар ва белгиланган талабларга жавоб бермайдиган маҳсулотларни сотиш ҳолатлари кўпайган эди.
Изоҳлар мавжуд емас