Ўзбекистон, Тошкент - Batafsil.uz. Транспорт вазирлиги томонидан "Таълим ташкилотлари педагогларига Ўзбекистон бўйлаб саёҳат қилиш учун авиа ва темир йўл чипталари қийматига чегирмалар бериш тартиби тўғрисидаги низомни тасдиқлаш ҳақида"ги ҳукумат қарори лойиҳаси жамоатчилик муҳокамасига қўйилди. Мазкур ҳужжатга кўра, 2026/2027 ўқув йилидан бошлаб мамлакатимиздаги энг намунали ва юқори рейтингга эга бўлган таълим ташкилотларининг ўқитувчи ҳамда профессор-ўқитувчилари учун йилига бир марта Ўзбекистон бўйлаб саёҳат қилиш учун чипталарни чегирмали нархларда харид қилиш тартибини доимий асосда жорий этиш таклиф қилинмоқда.
Янги қоидаларга мувофиқ, ушбу имтиёздан республика рейтингида ТОП-100 таликка кирган умумтаълим мактаблари ва мактабгача таълим ташкилотлари, ТОП-20 таликдан жой олган техникумлар ҳамда ТОП-10 талик таркибига кирувчи олий таълим муассасалари ходимлари фойдаланишлари мумкин бўлади. Ҳужжатда белгиланишича, мазкур педагогларга эркин сотувда бўлган авиа ва темир йўл чипталари тариф қисмининг 15 фоизи миқдорида чегирма тақдим этилади.
Бунда имтиёз самолётларнинг эконом-класси, шунингдек, поездларнинг плацкарт ёки купе вагонлари учун амал қилади, бироқ тезюрар поездлар бундан мустасно ҳисобланади. Шу билан бирга, имтиёзли саёҳат қатновлари тўғри йўналишда — фақат бир томонга ёки бориш ва келиш шаклида амалга оширилиши лозим. Ушбу қарор лойиҳасининг жамоатчилик ўртасидаги муҳокамаси жорий йилнинг 3 июнига қадар давом этади.
Олдинроқ педагоглар ва иқтидорли ўқувчилар Ўзбекистондаги соғломлаштириш оромгоҳларига бепул юборилиши белгиланганди. Харажатлар бюджет ва ҳомийлар ҳисобидан қопланади. Келгуси йилда қанча одам дам олишга бориши декабрь ойидаёқ маълум бўлади.
Изоҳлар мавжуд емас