Ўзбекистон, Тошкент - Batafsil.uz. Республикамизда менингококк инфекцияси билан касалланиш ҳолатлари ортиши муносабати билан Санитария-эпидемиологик осойишталик ва жамоат саломатлиги қўмитаси томонидан профилактик чора-тадбирлар кучайтирилди. Ҳозирга қадар 8024 доза вакцина харид қилиниб, беморлар билан мулоқотда бўлган 4862 нафар фуқаро эмланди.
2026 йилнинг биринчи чорагида Ўзбекистонда жами 174 та менингококк инфекцияси ҳолати қайд этилган. Ушбу касалликка чалинганларнинг аксарияти, яъни 168 нафарини 14 ёшгача бўлган болалар ташкил этади. Қўмита маълумотларига кўра, жорий йилнинг апрель ойида касалланиш динамикасида март ойига нисбатан 14 фоизлик камайиш кузатилган.
Вакцинациядан ташқари, эмлашга тиббий қарши кўрсатмалари бўлган беморлар билан мулоқотда бўлган фуқаролар шифокорлар назорати остида кимёвий профилактика курсларини ўтамоқда. Мутахассислар аҳолини касалликдан ҳимоя қилишда эмланиш инфекциядан ҳимояланишнинг энг самарали усули эканлигини айтмоқда.
Шахсий гигиена қоидаларига қатъий амал қилиш, касаллик аломатлари сезилганда дарҳол шифокорга мурожаат қилиш, "Ҳаж" ва "Умра" сафарларига отланган фуқароларга боришдан аввал эмланиш ва қайтгандан сўнг оммавий тадбирларда иштирок этишни вақтинча чеклаш тавсия этилмоқда.
Менингит — бош ва орқа мия пардаларининг яллиғланиши бўлиб, бактерия ёки вируслар таъсирида келиб чиқади. Унинг асосий хавфи касалликнинг ўта тез ривожланишидадир.
Санитария-эпидемиологик осойишталик ва жамоат саломатлиги қўмитаси ҳозирда республикада эпидемиологик вазият барқарорлигини таъминлаш учун кенг кўламли ишлар амалга оширилаётганини маълум қилди. Фуқаролардан фақат расмий ва ишончли манбалардан маълумот олиш сўралган.
Олдинроқ COVID-19 вирусининг "Цикада" деб номланган янги BA.3.2 штамми ҳақидаги хабарлар бўйича Ўзбекистонда эпидемиологик вазият барқарор экани маълум қилинганди.
Изоҳлар мавжуд емас