Ўзбекистон, Тошкент - Batafsil.uz. Ўзбекистонда муддатидан илгари шартли равишда озод қилинганлар устидан назоратни кучайтириш таклиф қилинди. Қонун лойиҳасига кўра, жазони ўташдан муддатидан илгари шартли озод қилинган фуқаролар пробация органларида мунтазам равишда рўйхатдан ўтиб туриши, қоидабузарлик содир этган тақдирда эса жазони такроран ўташлари мумкин бўлади.
Тегишли қонун лойиҳаси Ўзбекистон Олий Мажлисининг навбатдаги мажлисида кўриб чиқилди.
ЖИКни янги 28-1-боб билан тўлдириш режалаштирилмоқда, унда пробация назоратини амалга ошириш асослари, қўшимча мажбуриятлар ёки улардан озод қилиш тўғрисида судга тақдимнома киритиш тартиби, шунингдек, назорат талаблари бузилган тақдирда жазони ўташ учун такроран юбориш назарда тутилади.
Депутатларнинг қайд этишича, қонун лойиҳасининг қабул қилиниши пробация тизимини мустаҳкамлашга, унинг самарадорлигини оширишга, жамоат тартибини сақлашга, қонунга ҳурматни шакллантиришга ва такроран жиноят содир этиш хавфини камайтиришга хизмат қилади.
Қонун лойиҳаси биринчи ўқишда қабул қилинди.
Эслатиб ўтамизки, Ўзбекистонда унча оғир бўлмаган жиноятлар учун ҳукм қилинган вояга етмаганлар судланмаган деб ҳисобланиши мумкин, ўсмирлар учун озодликдан маҳрум қилишнинг энг кам муддати бир ойгача қисқартирилади.
Изоҳлар мавжуд емас