АҚШнинг йирик телеканаллари Трамп фаолиятини умумий ёритишни тўхтатди. Нега?

Ўзбекистон, Тошкент - Batafsil.uz.   АҚШнинг ABC, CBS, NBC, Fox News ва CNN телеканаллари президент Дональд Трамп тадбирларини навбатма-навбат тасвирга олиб, бошқа ОАВларга тақдим этадиган телевизион матбуот гуруҳи фаолиятини тўхтатди. Қарор Оқ уй CNN, MS NOW ва Politico журналистларининг президент қароргоҳида ишлашини чеклаганидан кейин қабул қилинди.

Телевизион матбуот гуруҳи 21 сентябрь куни Трампнинг тадбирларини тасвирга олиши керак эди. Навбат бу сафар CNN зиммасига тушган, бироқ телеканал Оқ уй томонидан четлатилгани сабабли вазифани бажара олмаган. Қолган телеканаллар эса унинг ўрнига бошқа гуруҳ юборишдан бош тортган.

Ушбу тизим АҚШ президентининг кундалик фаолиятини телевизион ОАВлар ўртасида навбат билан ёритиш имконини беради. Навбатчи телеканал президентнинг тадбирларидан видеоларни тайёрлаб, уларни бошқа телеканал ва оммавий ахборот воситаларига ҳам тақдим этади. Шу тариқа барча ОАВлар ҳар бир тадбирга алоҳида тасвирга олиш гуруҳини юбориши шарт бўлмайди.

Низо 18 сентябрь куни Трампнинг CNN, MS NOW ва Politico нашрларини танқид қилиши ва уларнинг Оқ уйдаги фаолиятини чеклашини билдиришидан кейин кучайган. Президент ушбу ОАВларни ўзи "сохта хабарлар" деб ҳисоблаган материалларни тарқатишда айблаган.

19 сентябрь куни мазкур нашрларнинг журналистлари Оқ уй ҳудудига киритилмаган. Айрим журналистларнинг аккредитацияси ҳам бекор қилинган.

Вазият 21 сентябрь куни янги босқичга ўтган. CNN Трампнинг Нью-Йоркка ташрифи ва БМТ Бош Ассамблеяси билан боғлиқ тадбирларини ёритиш учун навбатдаги телевизион гуруҳ сифатида ишлаши керак эди. Аммо телеканал Оқ уйга киритилмагани учун бу вазифани бажара олмаган.

ABC, CBS, NBC ва Fox News эса CNN ўрнига навбатчи гуруҳни алмаштиришдан воз кечган. Телеканаллар қўшма баёнотида жамоатчилик ҳукумат фаолияти ҳақида аниқ ва мустақил ахборот олиш ҳуқуқига эга эканини таъкидлаган.

Шу билан бирга, Оқ уйнинг айрим ОАВларга қўйган чекловлари судгача етиб борган. CNN, MS NOW ва Politico федерал судга мурожаат қилиб, журналистларнинг Оқ уйда ишлаш имкониятини тиклашни сўраган. Улар чекловлар АҚШ Конституциясининг матбуот эркинлигини кафолатловчи Биринчи тузатишига зид эканини таъкидлаган.

Оқ уй эса президент қароргоҳида журналистларнинг ишлаши махсус кириш тартиби асосида амалга оширилишини билдириб, маъмуриятнинг ушбу тартибни белгилаш ҳуқуқини ҳимоя қилмоқда.