Ўзбекистон, Тошкент - Batafsil.uz. Жаҳон бозорида пахтага талаб пасайиб, экспортда логистика харажатлари ортиб бораётган шароитда пахтани биржада сотган фермерларга ҳам, уни харид қилган кластерларга ҳам ҳар тонна учун 500 минг сўмдан субсидия ажратилади.
Бу ҳақда 2026 йил 24 сентябрь куни Президент Шавкат Мирзиёев раислигида ўтказилган йиғилишда маълум қилинди.
Шунингдек, ўз ерида пахта етиштирган кластерлар учун ҳар гектарига 1,5 миллион сўмдан субсидия берилиши белгиланган.
Бундан ташқари, мутасаддиларга тайёр маҳсулот экспортчиларининг хорижий валютадаги кредитлари бўйича фоизларнинг 5 фоиздан, миллий валютадагисининг 14 фоиздан ошган қисмини 3 йил давомида компенсация қилиш бўйича топшириқ берилган.
Соҳа субъектларини янада қўллаб-қувватлаш мақсадида маркетплейслар орқали сотилган тўқимачилик маҳсулотлари қийматининг 3 фоизини қайтариш бўйича ҳам тегишли таклифлар тайёрланмоқда.
Йиғилишда кўп ишчили корхоналарни қўллаб-қувватлаш чоралари ҳам эълон қилинган. Камида 1 минг нафар ишчиси бўлган корхоналарнинг ходимларни ўқитиш, малакасини ошириш ва транспорт харажатларининг 50 фоизи компенсация қилинади. Бундай корхоналарда камида 5 йил ишлаган ходимларнинг фарзандлари учун олий таълим муассасаларидаги контракт тўловлари қоплаб берилади.
Олдинроқ февраль ойида Президент Шавкат Мирзиёев қишлоқ хўжалигини техника билан таъминлаш ва соҳани рақамлаштириш тақдимоти билан танишиб, пахта теримини машинада амалга ошириш улушини камида 70 фоизга етказиш ва фермерлар учун миллий валютада 10 йиллик имтиёзли лизинг тизимини жорий этиш бўйича кўрсатма берганди.
Изоҳлар мавжуд емас