Ўзбекистон, Тошкент - Batafsil.uz. Сенатнинг 20-ялпи мажлисида вакиллар томонидан болаларга нисбатан жиноятларнинг олдини олиш мақсадида педофилия учун хирургик кастрация амалиётини жорий этиш таклифи илгари сурилди.
Ташаббус муҳокамаси давомида вояга етмаганларга, хусусан, жажжи қизчаларга нисбатан содир этилаётган жинсий зўравонлик ҳолатлари жамиятда кескин эътироз ва чуқур оғриқ уйғотаётгани таъкидланган.
Муҳокама иштирокчиларининг қайд этишича, бу каби оғир жиноятга қўл урган шахслар озодликка чиққач ёки жазодан қутулиб қолгач, жиноятни такроран содир этиш хавфи юқори бўлиб қолавериши назарда тутилиб, шу хавфнинг олдини олиш ҳамда жамият ва болалар хавфсизлигини мустаҳкамлаш мақсадида баъзи хорижий мамлакатлар тажрибасида мавжуд бўлган кескин тиббий ва хирургик чораларни қонунчиликка киритиш таклиф қилинган.
Парламент аъзолари охирги йилларда мамлакатда зўравонликка қарши курашиш ва болалар муҳофазасини таъминлаш борасида давлат даражасида тоқатсизлик муносабати шаклланганини билдирган.
Масъулларнинг таъкидлашича, сўнгги уч йилда аёллар ва болалар ҳимоясига оид қабул қилинган қонунларнинг амалиётда ишлаш механизми доимий таҳлил қилиб борилмоқда. Жараён натижалари ва заруратга қараб, жиноятчиликка қарши жазо чоралари босқичма-босқич янада такомиллаштириб борилади.
Ўзбекистонда охирги йилларда қабул қилинган қонунларга кўра, вояга етмаганларнинг жинсий дахлсизлигига тажовуз қилган шахсларга нисбатан жазо муддатини ўташдан муддатидан илгари шартли озод қилиш ёки жазони енгиллаштириш тақиқланган.
Шунингдек, амалдаги тартибга мувофиқ, педофилия ва вояга етмаганларга нисбатан жинсий жиноят содир этган шахсларнинг ягона реестри юритилади ҳамда бундай шахсларга таълим, тарбия ва болалар билан боғлиқ муассасаларда ишлаш умрбод тақиқланган.
Эслатиб ўтамиз, аввалроқ Ўзбекистон мактаблари ва боғчаларида бир йилда 122 та болаларга нисбатан зўравонлик ҳолати аниқланганди.
Изоҳлар мавжуд емас