Ўзбекистон, Тошкент - Batafsil.uz. Сенатнинг 20-ялпи мажлисида "Уюшган жиноятчилик ҳамда жамоат тартибига қарши жиноятлар учун жавобгарлик янада кучайтирилиши муносабати билан Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида"ги Қонун маъқулланди. Янги ҳужжат билан уюшган гуруҳ таркибида безорилик содир этган 14 ёшга тўлган шахсларга нисбатан жиноий жавобгарлик белгиланмоқда.
Қонунга кўра, Жиноят кодексига уюшган жиноятчиликка қарши курашиш механизмларини мустаҳкамлашга қаратилган бир қатор муҳим ўзгартиришлар киритилмоқда.
Жумладан, жиноий ташкилот фаолиятини молиялаштириш, шунингдек, мансаб ваколатини суиистеъмол қилган ҳолда бундай ташкилот тузиш ёки у томонидан содир этилган жиноятларни яширишга кўмаклашиш учун алоҳида жавобгарлик назарда тутилмоқда.
Бундан ташқари, безорилик оқибатида қасддан баданга оғир шикаст етказиш ҳамда жабрланувчининг ўлимига сабаб бўлган ҳаракатлар учун ҳам жазо чоралари кучайтирилган.
Шунингдек, ҳужжат билан жанговар спорт турлари бўйича спорт мусобақаларини ноқонуний ташкил этиш ёки ўтказиш учун жиноий, бундай мусобақаларда иштирок этганлик учун эса маъмурий жавобгарлик белгиланмоқда.
Сенаторлар мазкур қонун уюшган жиноятчиликнинг молиявий ресурсларини чеклаш, ёшларни криминал муҳит таъсиридан ҳимоя қилиш ҳамда оғир оқибатларга олиб келувчи зўравонликнинг олдини олишда муҳим аҳамият касб этишини таъкидладилар.
Аввалроқ Олий Мажлис Сенатининг 20-пленар мажлисида сенаторлар 14 ёшга тўлмаган болаларга нисбатан жинсий зўравонлик содир этганлик учун умрбод озодликдан маҳрум қилиш жазосини назарда тутувчи қонунни маъқуллаганди.
Изоҳлар мавжуд емас