Ўзбекистон, Тошкент - Batafsil.uz. Ўзбекистон Конституциявий суди шахсни маъмурий тартибда уч суткагача, ҳужжатлар бўлмаган тақдирда эса прокурор санкцияси билан ўн суткагача ушлаб туришга рухсат берувчи меъёрни Конституцияга мувофиқ эмас деб топди. Суднинг кўрсатишича, суд қарорисиз ушлаб туриш муддати 48 соатдан ошмаслиги керак.
Гап Маъмурий жавобгарлик тўғрисидаги кодекснинг 288-моддаси иккинчи қисми ҳақида бормоқда. У давлат чегараси орқали ўтиш пунктларида чегара режими ёки қоидаларини бузган шахсларга тааллуқли эди.
Масала 22 сентябрь куни Олий Мажлиснинг Инсон ҳуқуқлари бўйича вакили мурожаати асосида кўриб чиқилди. Мурожаатда қайд этилишича, 2025−2026 йилларда 48 соатдан ортиқ муддатга маъмурий қамоққа олиш ҳолатлари юзасидан фуқаролардан 6 та шикоят келиб тушган.
Конституциянинг 27-моддаси суд қарорисиз шахсни 48 соатдан ортиқ ушлаб туришни тақиқлайди. Шу билан бирга, низолашилаётган меъёр чегара режимини бузган шахсни уч суткагача, шахсини тасдиқловчи ҳужжати бўлмаган тақдирда эса прокурор санкцияси билан ўн суткагача ушлаб туриш имконини берган.
Конституциявий суднинг таъкидлашича, амалдаги тартибда ушлаб туришни 48 соатдан ортиқ муддатга узайтириш учун суд қарорини олиш назарда тутилмаган. Шунинг учун уч ва ўн суткалик муддатлар конституциявий кафолатга зид эди.
Суд прокурорнинг билдиришномаси ёки унинг санкцияси шахсни 48 соатдан ортиқ ушлаб туриш учун зарур бўлган суд қарорини алмаштириши мумкин эмаслигини алоҳида таъкидлади.
Натижада Маъмурий жавобгарлик тўғрисидаги кодекснинг 288-моддаси иккинчи қисмининг уч суткагача ва прокурор санкцияси билан ўн суткагача ушлаб туришни назарда тутувчи қисми Конституцияга номувофиқ деб топилди.
Аввалроқ, Ўзбекистонда маъмурий судларнинг фуқаролар ва тадбиркорлар ҳуқуқларини ҳимоя қилиш имкониятларини кенгайтириш кўзда тутилган эди.
Изоҳлар мавжуд емас