Ўзбекистон, Тошкент - Batafsil.uz. Ўзбекистонда кичик ва ўрта бизнес субъектлари учун "Иккинчи имконият" номли иқтисодий амнистия жорий этилди. Президентнинг тегишли фармонига кўра, мазкур тартиб 2026 йил 31 декабрга қадар амал қилади.
Амнистия доирасида тадбиркор солиқ қарздорлигини тўлиқ тўлаган тақдирда, унга ҳисобланган пенялар ҳисобдан чиқарилади. Шунингдек, бундай қарздорликлар бўйича юритилаётган ижро ишлари ҳам тугатилади.
Агар тадбиркор йил охирига қадар солиқ ҳисоботини мустақил равишда аниқлаштириб, қўшимча ҳисобланган солиқларни тўласа, ушбу маблағларга пеня ҳисобланмайди. Амнистия доирасида хатоларини мустақил тузатган тадбиркорларнинг барқарорлик рейтингидаги баллари ҳам камайтирилмайди.
Бундан ташқари, солиқ ҳисоботини ўз вақтида тақдим этмаганлик ҳамда белгиланган айланмадан олинадиган солиқ бўйича ҳисоботни топширмаганлик учун тўланмай қолган жарималар ҳам бекор қилинади.
Аввал расмийлаштирилган меҳнат шартномаларини Ягона миллий меҳнат тизимига кечиктириб киритганлик учун ҳам жарима қўлланмайди.
Янги тартиб тадбиркорларга йўл қўйилган хатоларни жарималарсиз тузатиш имконини бериш, солиқ қарздорлигини қисқартириш ва кичик ҳамда ўрта бизнесни қўллаб-қувватлашга қаратилган.
Изоҳлар мавжуд емас