Ўзбекистон, Тошкент - Batafsil.uz. Ўзбекистонда 2026 йилнинг апрель ойи ўртача илиқ ҳарорат билан тавсифланиб, кўп йиллик иқлим меъёрларидан 1−2,6 даражага юқори бўлди. Ўзгидромет шарҳига кўра, ой давомида энг иссиқ кунларда ҳарорат +28…+33 даражагача, мамлакатнинг жанубий ва чўл ҳудудларида эса +34…+36 даражагача кўтарилган.
Шу билан бирга, жорий йилнинг апрели 2025 йилги кўрсаткичларга қараганда анча салқинроқ ўтган. Ойнинг энг салқин даври 15-18 апрель кунларига тўғри келиб, бунда тунги ҳарорат +5…+10 даражани, кундузи эса +13…+18 даражани ташкил этган. Бундай ҳарорат тартиби боғларнинг қийғос гуллаши ва баҳорги экин ишлари учун қулай шароит яратди.
Ёғингарчилик масаласида ўтган ой нисбатан қурғоқчил келиб, аксарият ҳудудларда ёғин миқдори меъёрдан кам бўлган. Бироқ Қорақалпоғистон, Хоразм ва Навоий вилоятларида апрель ойидаги ёғингарчилик кўп йиллик меъёрлардан юқори бўлганлиги қайд этилган. Самарқанд, Қашқадарё ва Сурхондарё вилоятларининг тоғолди ҳудудларида ҳам ёғингарчилик меъёр атрофида ва ундан кўпроқ кузатилган.
Айрим кунларда кучли жала ёғиши натижасида тоғолди ва тоғли ҳудудларда сел-сув тошқинлари фаоллашган. Хусусан, Қашқадарё ва Тошкент вилоятларида бир суткада ойлик меъёрнинг 70 фоизигача бўлган ёғингарчилик кузатилган. Ёмғирлар тез-тез момақалдироқ, кучли шамол ва айрим жойларда дўл билан бирга кечган.
Изоҳлар мавжуд емас