Ўзбекистон, Тошкент – Batafsil.uz. Ўзбекистонда фармацевтика компаниялари ва дорихоналар маркировкаланмаган ёки контрафакт дори воситаларини сотганлик учун лицензиясидан маҳрум этилади. Импорт дори воситаларини сотиш билан фақат расмий импорт қилувчилар ёки уларнинг дилерлари шуғулланиши мумкин бўлади.
Фармацевтика соҳасини тартибга солишдаги бу ва бошқа янгиликлар президент қарорида белгиланган.
Импорт дори воситаларини сотиш бўйича талаблар 1 июлдан кучга киради. Уларни сотиш билан фақат маҳсулотларни ўзлари олиб кирадиган компаниялар, шунингдек, уларнинг расмий дилерлари шуғулланиши мумкин.
1 сентябрдан фармацевтика корхоналарини лицензиялаш, шунингдек, дори воситалари ва тиббий буюмларни чакана сотиш бўйича бир қатор талаблар кучайтирилади. Бундай фаолиятни бошлаш учун бир қатор шартларни бажариш талаб этилади. Бундан ташқари, янги компаниялар кўчмас мулкни ижарага бериш ёки текин фойдаланиш бўйича солиқ шартномасида ҳисобга қўйишлари керак бўлади.
Фармацевтика корхоналари ва дорихоналар дори воситаларини сотишда карта ва бошқа электрон тўлов воситалари орқали тўлаш имкониятини таъминлаши шарт. Соғлиқни сақлаш вазирлиги ва Солиқ қўмитаси томонидан июль ойи якунига қадар янги талабларга мувофиқ маълумотлар алмашиш тизими йўлга қўйилади.
Ваколатли орган текширув давомида контрафакт ва маркировкаланмаган дори воситаларини харид қилиш, ташиш, сақлаш ёки сотиш ҳолатларини аниқласа, дорихоналар лицензиясининг амал қилиши тўхтатиб турилади.
Эслатиб ўтамиз, 2022 йил сентябрь ойидан бошлаб Ўзбекистонда дори воситалари ва тиббий буюмларни мажбурий рақамли маркировкалаш тизими босқичма-босқич жорий этила бошланди.
Сўнгги маълумотларга кўра, Асл Белгиси рақамли маркировкалаш тизимида 8 мингдан ортиқ товар айланмаси иштирокчилари ва 12 мингдан ортиқ дори воситалари рўйхатдан ўтган.
Изоҳлар мавжуд емас