Марко Рубио Самарқандга келди: АҚШ ва Марказий Осиё давлатлари савдо, инвестиция ва хавфсизликни муҳокама қилади

Ўзбекистон, Тошкент - Batafsil.uz.  АҚШ давлат котиби Марко Рубио рафиқаси билан 18 октябрь куни Самарқандга келди. Уни аэропортда Ўзбекистон Президенти Администрацияси раҳбари Саида Мирзиёева бошчилигидаги расмийлар кутиб олди. Ташриф доирасида АҚШ ва Марказий Осиёнинг бешта давлати ўртасидаги C5+1 форматида вазирлар учрашуви, шунингдек, Ўзбекистон–АҚШ Бизнес ва инвестициялар кенгашининг навбатдаги йиғилиши ўтказилиши режалаштирилган. Саида Мирзиёева ижтимоий тармоқларда Марко Рубиони Самарқандда кутиб олишдан мамнун эканини билдирган. Унинг қайд этишича, бу АҚШ давлат котибининг Марказий Осиёга илк ташрифи ҳисобланади. Дастурда минтақавий музокаралар, бизнес вакиллари билан учрашувлар ҳамда икки мамлакат ўртасидаги иқтисодий ҳамкорликни кенгайтириш масалалари бор.

Ташрифнинг асосий мақсади нима?

Рубионинг Самарқандга ташрифи фақат дипломатик учрашувлар билан чекланмайди. АҚШ делегацияси таркибида 200 дан ортиқ америкалик ишбилармонлар ҳам бор. Томонлар савдо алоқаларини кенгайтириш, инвестицияларни жалб қилиш ва қўшма лойиҳаларни ривожлантириш имкониятларини муҳокама қилиши кутилмоқда. 

АҚШ Давлат департаменти маълумотларига кўра, ташриф доирасида Марказий Осиё давлатлари вакиллари билан иқтисодий ҳамкорлик, минтақавий хавфсизлик ва стратегик манфаатларга оид масалалар кўриб чиқилади.

Самарқанддаги учрашувда АҚШ давлат котиби ушбу мамлакатларнинг ташқи ишлар вазирлари билан мулоқот қилиши, шунингдек, ҳар бир давлат вакиллари билан икки томонлама музокаралар ўтказиши кутилмоқда.

Вашингтон учун Марказий Осиё табиий ресурслар, транспорт йўлаклари ва минтақавий иқтисодий алоқалар нуқтаи назаридан муҳим. Минтақа Россия, Хитой ва Эрон ўртасида жойлашгани сабабли унинг ташқи иқтисодий ва хавфсизлик сиёсатидаги ўрни ҳам катта.

Ўзбекистон–АҚШ бизнес кенгаши нимани муҳокама қилади?

Ташрифнинг муҳим қисмларидан бири — Америка–Ўзбекистон Бизнес ва инвестициялар кенгашининг иккинчи йиғилиши. У икки мамлакат ўртасидаги савдо ва сармоявий ҳамкорликни ривожлантириш, тадбиркорлар ўртасидаги алоқаларни мустаҳкамлаш ва қўшма лойиҳаларни илгари суриш учун ташкил этилган.

16 октябрь куни Президент Шавкат Мирзиёев АҚШнинг Жанубий ва Марказий Осиё бўйича махсус вакили Серджио Гор билан учрашиб, Марко Рубио ташрифи, C5+1 вазирлар учрашуви ва бизнес кенгаши йиғилишига тайёргарлик масалаларини муҳокама қилган. Томонлар аниқ таклифлар ишлаб чиқиш ва устувор йўналишлардаги қўшма лойиҳаларни амалга ошириш муҳимлигини таъкидлаган.