Ўзбекистон, Тошкент - Batafsil.uz. Кеча, 11 ноябрь куни, Ўзбекистон Республикаси Президенти Шавкат Мирзиёев Россия Федерацияси Президенти Владимир Путин билан телефон орқали суҳбатлашди. Томонлар кенг қамровли стратегик шериклик ва иттифоқчилик муносабатларини ривожлантириш ҳамда олий даражадаги келишувларни амалга ошириш масалаларини муҳокама қилганлар.
Мулоқот давомида икки давлат ўртасидаги товар айирбошлаш ҳажмини сақлаб қолиш, иқтисодиётнинг устувор соҳаларида, жумладан энергетика йўналишида қўшма лойиҳаларни илгари суриш ҳамда ҳудудлар ўртасидаги ишбилармонлик ва маданий-гуманитар алоқаларни кенгайтириш масалаларига эътибор қаратилган.
Суҳбатда 22 октябрь куни Москвада бўлиб ўтган Ўзбекистон ва Россия ҳудудлари кенгашининг иккинчи йиғилиши самарали ўтгани қайд этган. Шунингдек, 3 декабрь куни бўлиб ўтадиган Ўзбекистон–Россия Ҳукуматлараро комиссиясининг навбатдаги йиғилиши ҳамда унинг доирасидаги қўшма бизнес форумини самарали ташкил этиш зарурлиги таъкидланган.
Президентлар халқаро ва минтақавий аҳамиятга эга долзарб масалалар юзасидан ҳам фикр алмашиб, яқин келажакдаги икки томонлама тадбирлар режасини муҳокама қилганлар.
Эслатиб ўтамиз, жорий йилнинг 10-октябрь куни Президент Шавкат Мирзиёев "Марказий Осиё - Россия" форматидаги иккинчи саммитда иштирок этиб, Москва билан стратегик шерикликни чуқурлаштириш бўйича кенг кўламли дастурни тақдим этган эди.
Изоҳлар мавжуд емас