Шавкат Мирзиёев футболчиларни айбламасликка чақирди: "Уларни қўллаб-қувватлаш ҳар қачонгидан муҳим"

Ўзбекистон, Тошкент - Batafsil.uz. Бугун, Ёшлар куни муносабати билан Президент Шавкат Мирзиёев мамлакатимизнинг фаол ва ташаббускор ёшлари билан учрашиб, уларнинг турли соҳалардаги лойиҳалари билан танишди ҳамда бир гуруҳ иқтидорли йигит-қизларга юксак давлат мукофотларини топширди. Самимий руҳда ўтган мулоқот давомида давлатимиз раҳбари алоҳида тўхталиб ўтган мавзулардан бири — Ўзбекистон миллий терма жамоасининг футбол бўйича жаҳон чемпионатидаги тарихий иштироки бўлди.

Президент миллий жамоамизнинг АҚШ ва Мексика майдонларидаги ўйинларини бутун халқимиз катта ҳаяжон ва бирдамлик билан кузатиб борганини таъкидлаган. Вакилларимиз дунё футболи грандлари, хусусан, FIFA рейтингида 5-ўринда турган Португалия, 13-ўриндаги Колумбия ҳамда аксарият футболчилари Европанинг кучли клубларида тўп сурадиган Конго терма жамоаларига қарши муносиб баҳс олиб бориб, катта тажриба тўплагани ва мундиал нафасини ҳис қилгани эътироф этилган. Шунингдек, етакчи футболчиларимиз Аббос Файзуллаев ва Элдор Шомуродов жаҳон чемпионатидаги ўзларининг илк голларини уриб, юртимизга унутилмас қувончли лаҳзаларни туҳфа этгани қайд этилган.

Давлатимиз раҳбари ижтимоий тармоқлар ва жамоатчилик ўртасида терма жамоа ўйини атрофида бўлаётган баҳс-мунозараларга ҳам муносабат билдирган:

"Миллий терма жамоамизнинг жаҳон чемпионатидаги иштироки тўғрисида турли фикрлар билдирилмоқда. Лекин Ватанимиз шарафини ҳимоя қилган терма жамоамиз аъзоларига ортиқча ҳис-туйғу билан эътироз билдириш, улардан айб қидириш халқимизга хос иш эмас. Аксинча, бугун уларни қўллаб-қувватлаш, руҳини кўтариш ҳар қачонгидан ҳам муҳим".

Президент катта ғалабалар ҳали олдинда эканини ишонч билан таъкидлаб, мамлакатимизда футболни ривожлантириш учун шароитлар янада кенгайтирилиши ва соҳага инвестициялар ҳажми кўпайтирилишини маълум қилган. Бунда асосий эътибор болалар футболига қаратилиб, ушбу спорт тури умуммиллий ҳаракатга айлантирилади.

Шунингдек, келаси йилнинг январь ойида Саудия Арабистонида бўлиб ўтадиган Осиё кубогига тайёргарлик ишлари ҳозирданоқ бошланиши эълон қилинган. "Биз жамоамизга ишонамиз ва ушбу мусобақада ҳам бутун халқимиз билан қўллаб-қувватлаймиз!" — дея якунлаган ўз сўзини Президент Шавкат Мирзиёев.

Эслатиб ўтамиз, Ўзбекистон терма жамоаси сўнгги ўйинда Конго ДРга 1:3, Португалия терма жамосига 0:5, Колумбияга қарши илк дебют учрашувида ҳам 1:3 ҳисобида мағлуб бўлган эди.