Ўзбекистон, Тошкент - Batafsil.uz. Ўзбекистон Президенти Шавкат Мирзиёев Италия Республикаси Вазирлар Кенгаши Раиси Жоржа Мелонига мактуб йўллаб, уни Италия ҳукумати раҳбари лавозимида шу вақтга қадар энг узоқ муддат фаолият юритган раҳбар сифатида тарихдан муносиб ўрин олгани билан табриклади.
Давлат раҳбари бу натижа Жоржа Мелонининг сиёсий иродаси, қатъияти ва давлатчилик масъулиятини чуқур ҳис этишига Италия халқи томонидан билдирилган юксак ишончнинг ёрқин тасдиғи эканини таъкидлаган.
Мактубда мураккаб ва тез ўзгараётган халқаро вазият шароитида Италиянинг миллий манфаатларини ҳимоя қилиш, мамлакатнинг Европа Иттифоқи ва халқаро майдондаги нуфузини янада мустаҳкамлаш борасида Жоржа Мелони олиб бораётган саъй-ҳаракатлар алоҳида эътироф этилган.
Шавкат Мирзиёев Италия ҳукумати раҳбарининг Ўзбекистонга нисбатан дўстона муносабати ҳамда икки давлат ўртасидаги кўп қиррали ҳамкорликни изчил кенгайтиришга қаратаётган доимий эътибори учун миннатдорлик билдирган.
Ўзбекистон Италия билан ўрнатилган стратегик шериклик муносабатларини юксак қадрлаши қайд этилган. Айни пайтда сиёсий мулоқот, савдо-иқтисодий ва инвестициявий ҳамкорлик, шунингдек, маданий-гуманитар алоқалар янги мазмун билан бойиб, икки томонлама муносабатлар сифат жиҳатидан янги босқичга кўтарилаётгани таъкидланган.
Мактуб якунида Президент Шавкат Мирзиёев Жоржа Мелонига мустаҳкам соғлик, оилавий бахт-саодат ва масъулиятли давлатчилик фаолиятида улкан муваффақиятлар, Италия халқига эса тинчлик-осойишталик, фаровонлик ва барқарор тараққиёт тилаган.
Эслатиб ўтамиз, 2025 йилнинг май ойида Самарқандда Шавкат Мирзиёев Италия Бош вазири Жоржа Мелони билан олий даражадаги музокаралар ўтказганди.
Изоҳлар мавжуд емас