Ўзбекистон, Тошкент - Batafsil.uz. Тошкент шаҳар ҳокимлиги раҳбариятида иқтисодиёт ва рақамли ривожланиш йўналишлари бўйича янги тайинловлар амалга оширилди. Бу ҳақда Тошкент шаҳар ҳокимлиги матбуот хизмати хабар қилди.
Маълум қилинишича, мазкур ўзгаришлар иқтисодий ислоҳотларни жадаллаштириш ва шаҳар бошқарувида замонавий технологияларни кенг жорий этиш мақсадида амалга оширилган.
Хусусан, Даулетияр Худайбергенов Тошкент шаҳар ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари — шаҳар иқтисодиёт ва молия бош бошқармаси бошлиғи этиб тайинланди. 1990 йилда туғилган мутахассис шу кунга қадар Президент Администрациясида бошқарма бошлиғи лавозимида фаолият юритган бўлиб, халқаро молиявий лойиҳалар ва бозор механизмларини жорий этишда катта тажрибага эга.
Шунингдек, Алишер Дусмухамедов Тошкент шаҳар ҳокимининг ахборот технологияларини жорий этиш бўйича ўринбосари — Рақамли ривожланиш департаменти раҳбари лавозимини эгаллади. 1981 йилда туғилган Дусмухамедов илгари Божхона қўмитасининг АКТ ва киберхавфсизликни таъминлаш бошқармаси бошлиғи сифатида ишлаб келган ва соҳада тўртта олий маълумотга эга эксперт ҳисобланади.
Мазкур тайинловлар пойтахтнинг инвестициявий жозибадорлигини ошириш ҳамда шаҳар бошқарувини тўлиқ рақамлаштириш йўлидаги стратегик қадам сифатида баҳоланмоқда.
Изоҳлар мавжуд емас