Ўзбекистон, Тошкент - Batafsil.uz. Андижон шаҳридаги "Боғишамол" истироҳат боғида аттракционнинг металл конструкцияси синиши ва занжирлар узилиши оқибатида кўнгилсиз ҳодиса юз берди. 26 апрель, якшанба куни содир бўлган ушбу воқеа натижасида жароҳатланганлар сони бўйича расмий маълумотлар ва гувоҳлар кўрсатмаларида тафовут кузатилмоқда.
Андижон вилояти Фавқулодда вазиятлар бошқармаси (ФВБ) аттракционда техник носозлик юзага келганини тасдиқлади. Ҳозирда мазкур ҳолат юзасидан суриштирув ишлари олиб борилмоқда.
ФВБ икки нафар фуқаро енгил тан жароҳати олганини ва уларга малакали тиббий ёрдам кўрсатилганини маълум қилган. Воқеа гувоҳлари ва айрим ОАВлар жароҳатланганлар сони камида етти нафар бўлиши мумкинлигини хабар қилмоқда.
Дастлабки маълумотларга кўра, конструкциянинг металл қисми синиши ва занжирларнинг узилиши аттракционнинг қулашига олиб келган.
Ҳозирда мутахассислар аттракционнинг техник ҳолатини ўрганмоқда. Тергов давомида объект мавсум бошланишидан олдин мажбурий техник кўрикдан ўтганми ёки йўқлиги ҳамда жиҳозларнинг созлиги учун ким масъул эканига аниқлик киритилади. Парк маъмурияти ҳозирча юз берган воқеа юзасидан расмий изоҳ бергани йўқ.
Изоҳлар мавжуд емас