Ўзбекистон, Тошкент - Batafsil.uz. Тошкент вилоятининг Пискент туманида сув иншоотини балансга ўтказиш жараёнида 14 800 метр сув қувурларини ўзилаштириб юборган шахслар ушланди. Коррупцияга қарши курашиш агентлиги ва Иқтисодий жиноятларга қарши курашиш департаменти томонидан ўтказилган назорат ўлчови натижасида давлат манфаатларига йирик миқдорда зарар етказилгани аниқланган.
Суриштирув давомида "Тошкент вилояти сув таъминоти" компанияси туман филиали раҳбари ва бошқа масъул шахслар иштирокида амалга оширилган жиноий схема фош этилди. Пискент тумани "Гулистон" маҳалласи ҳудудидаги "Сағанак" сув иншоотида жами 3 миллиард 931,2 миллион сўмлик қувурларнинг 3 миллиард 78,4 миллион сўмлик қисми талон-торож қилинган.
"Тошкент вилояти сув таъминоти" компанияси филиали раҳбари ва яна бир компания мансабдор шахслари олдиндан тил бириктириб, 14 800 метр сув қувурларини қазиб олиш орқали ўзлаштириб юборишган.
Ҳолат юзасидан туман филиали раҳбари ва бошқа шерикларига нисбатан Жиноят кодексининг 167-моддаси 3-қисми "а" банди (жуда кўп миқдорда ўзлаштириш ёки растрата йўли билан талон-торож қилиш) билан жиноят иши қўзғатилган.
Мутасадди идоралар коррупцияга қарши кураш ва жазо муқаррарлигини таъминлаш ишлари қатъий давом эттирилишини маълум қилган. Фуқаролардан коррупция ҳолатларига дуч келганда Агентликнинг 1253 қисқа рақамига мурожаат қилиш сўралмоқда.
Аввалроқ ҳам Коррупцияга қарши курашиш агентлиги ногиронлиги бўлган шахсларга тиббий-ижтимоий ёрдам кўрсатиш бўйича онлайн видеоалоқа платформасини яратиш жараёнидаги қонунбузилиш ҳолатларини аниқлаганди. Мазкур лойиҳа Президентнинг ПФ-87-сонли фармони ижроси доирасида амалга оширилиши лозим эди.
Изоҳлар мавжуд емас