Ўзбекистон, Тошкент - Batafsil.uz. Ўзбекистон Президенти Шавкат Мирзиёев ва Грузия Бош вазири Ираклий Кобахидзе икки мамлакат расмий делегациялари иштирокида кенг қамровли музокаралар ўтказдилар. Давлат раҳбари ушбу давлат ташрифи охирги йигирма йилдан ортиқ вақт ичида биринчиси эканлигини ва икки томонлама муносабатларни мутлақо янги сифат босқичига кўтаришини алоҳида таъкидлади. Учрашувнинг энг муҳим натижаларидан бири сифатида Ўзбекистон Республикасининг Грузияда ўз элчихонасини таъсис этиши тўғрисида қарор қабул қилинди.
Музокаралар давомида асосий эътибор иқтисодий ва транспорт-логистика алоқаларини кенгайтиришга қаратилган. Ўтган йили икки давлат ўртасидаги товар айирбошлаш ҳажми 270 миллион долларни, жорий йил бошидан буён эса 100 миллион доллардан ортиқни ташкил этган бўлиб, ушбу кўрсаткични яқин йилларда 1 миллиард долларга етказиш бўйича алоҳида "йўл харитаси" қабул қилинадиган бўлган. Шунингдек, Ўзбекистон юкларини ташишда Грузиянинг Поти ва Батуми портлари инфратузилмасидан унумли фойдаланиш, у ерда логистика хаби ва саноат зонасини ташкил этиш режалари қўллаб-қувватланган. Транспорт соҳасида Баку–Тбилиси–Карс темир йўли коридорини барпо этилаётган Хитой–Қирғизистон–Ўзбекистон магистрали билан боғлаш таклифи илгари сурилган.
Бундан ташқари, қишлоқ хўжалиги, фармацевтика, қурилиш материаллари, ИТ-сектор ва рақамли банкинг йўналишларида янги лойиҳаларни молиялаштириш учун қўшма Инвестиция фондини ташкил этишга келишилган. Маданий алоқалар доирасида Тбилиси паркларидан бирига ўзбек шоири Алишер Навоий номи берилгани учун миннатдорлик билдирилган. Музокаралар якуни бўйича эришилган барча келишувларни ҳаётга татбиқ этиш юзасидан икки давлат ҳукуматлари томонидан қўшма "йўл харитаси" ишлаб чиқилади.
Изоҳлар мавжуд емас