Ўзбекистон, Тошкент - Batafsil.uz. Президент Шавкат Мирзиёев Италиянинг Тоскана минтақаси губернатори Эудженио Джани билан учрашув ўтказди. Иқтисодиёт, инвестиция, таълим, маданият ва туризм соҳаларидаги ҳамкорликни кенгайтириш масалалари муҳокама қилинди. Шунингдек, томонлар Тоскана ва Ўзбекистон ҳудудлари ўртасида янги лойиҳаларни ўз ичига олган қўшма "йўл харитаси"ни тайёрлашга келишиб олдилар.
Учрашувда Ўзбекистон-Италия стратегик шериклиги жадал ривожланиб бораётгани таъкидланди. 2026 йил бошидан буён ўзаро савдо ҳажми чорак баробарга ошди. Ўзбекистонда Италиянинг етакчи компаниялари билан металлургия, энергетика, қишлоқ хўжалиги, кимё саноати ва бошқа тармоқларда қўшма лойиҳалар амалга оширилмоқда.
Ҳудудлараро алоқаларга алоҳида эътибор қаратилди. Тоскана ва Ўзбекистонни кўп асрлик тарихий муносабатлар боғлаб тургани таъкидланди. Буюк ипак йўли даврида Флоренция ва Ўзбекистоннинг қадимий шаҳарлари ўртасида фаол савдо-сотиқ олиб борилган, флоренсиялик савдогарлар ва дипломатлар Амир Темур саройида бўлган.
Бугунги кунда гуманитар соҳадаги ҳамкорлик ҳам ривожланмоқда. Тошкентда Пиза университетининг филиали фаолият юритиб, бу йил илк талабаларни битирмоқда. Италиянинг Прато шаҳрида ўзбек тўқимачилик маҳсулотлари савдо уйи очилди, 2024 йилда Флоренциядаги Уффици галереясида ўзбек авангард санъати кўргазмаси бўлиб ўтди.
Музокаралар якунида томонлар тўқимачилик, чарм, озиқ-овқат ва заргарлик саноати, қурилиш, шунингдек, таълим, маданият ва туризм соҳаларида ҳамкорлик қилиш учун юқори салоҳият мавжудлигини таъкидладилар.
Президент Тоскана ва Бухоро вилояти ўртасида ҳамкорлик шартномаси имзоланганини ҳам олқишлади. Кейинги қадам Италия минтақаси ва Ўзбекистон вилоятлари ўртасида янги инвестициявий ва гуманитар лойиҳаларни бирлаштирувчи қўшма "йўл харитаси"ни тайёрлаш бўлади.
Тоскана Италиянинг энг ривожланган ҳудудларидан бири ҳисобланади. Унинг маъмурий маркази Ренессанс даври жаҳон пойтахтларидан бири сифатида эътироф этилган Флоренциядир. Минтақа саноат, қишлоқ хўжалиги, виночилик ва туризм билан машҳур.
Эслатиб ўтамиз, Италияда бўлиб ўтаётган 61-Венеция биенналесида Ўзбекистон Миллий павильони очилди. Бу йилги тадбир "In Minor Keys" мавзуси остида ўтказилмоқда.
Изоҳлар мавжуд емас