Ўзбекистон, Тошкент - Batafsil.uz. Туркияда йўл-транспорт ҳодисасига учраб, бошпанасиз ва маблағсиз қолган Ўзбекистон фуқароси бўлган аёл мамлакатнинг Истанбул шаҳридаги Бош консулхонаси ҳамда масъул идоралар кўмагида Ўзбекистонга хавфсиз олиб келинди. Оғир жароҳатлардан сўнг мураккаб ижтимоий ва моддий аҳволда қолган ватандошни репатриация қилиш тадбирлари тезкорлик билан ташкил этилган.
Маълум қилинишича, фуқаро Туркияга меҳнат фаолиятини амага ошириш мақсадида борган ва ўзи ишлаётган оила аъзолари билан биргаликда аварияга учраган. ЙТҲ оқибатида у танасининг бир нечта жойидан оғир жароҳат олган ва маҳаллий шифокорлар томонидан унда мураккаб жарроҳлик амалиёти ўтказилган. Бироқ даволаниш курси якунлангач, фуқаро пул маблағлари ва турар жойисиз, оғир аҳволда кўчада қолган.
Мазкур вазият юзасидан Истанбул шаҳридаги Бош консулхона, Вазирлар Маҳкамаси ҳузуридаги Миграция агентлиги ҳамда Uzbekistan Airways компанияси билан ҳамкорликда тезкор чора-тадбирлар режаси ишлаб чиқилган. Шифохона томонидан фуқарога парвоз қилишга рухсат берувчи тиббий хулоса (Fit to Fly) берилган бўлса-да, унинг соғлиғи алоҳида эҳтиёткорликни талаб қилгани боис авиакомпания ходимлари назорати остида махсус шароитларда Ватанга эвакуация қилинган.
Дипломатик ваколатхона ушбу жараёнда амалий ёрдам кўрсатган барча шерикларга миннатдорлик билдириб, хориждаги ватандошларнинг ҳуқуқларини ҳимоя қилиш ҳамда мураккаб аҳволдаги фуқароларга консуллик-ҳуқуқий ёрдам кўрсатиш Бош консулхона фаолиятининг устувор йўналиши бўлиб қолишини эслатиб ўтган.
Июнь ойида ҳам Ўзбекистоннинг Актау шаҳридаги Бош консулхонаси ва Миграция агентлиги кўмагида Қозоғистонда оғир аҳволда қолган беш нафар ўзбекистонлик ватанга қайтарилганди.
Изоҳлар мавжуд емас