Ўзбекистон, Тошкент - Batafsil.uz. Ўзбекистонда иккинчи атом электр станциясини қуриш бўйича катта тайёргарлик ишлари бошланган. Бу ҳақда Президент Хоразм вилоятига ташрифи чоғида маълум қилди.
Давлат раҳбари мамлакатга инвестиция киритишга тайёр инвесторлар келаётганини таъкидлаб, уларни биринчи навбатда электр энергиясининг нархи ва инвестиция кафолатлари қизиқтираётганини айтди.
"Бугун сизларга бир сирни очмоқчиман. Яқин вақт ичида биз иккинчи станция бўйича ҳам катта тайёргарлик ишларини олиб бормоқдамиз", — деган Президент.
Шу билан бирга, иккинчи АЭС қаерда қурилиши, унинг қуввати қандай бўлиши ва лойиҳа қачон амалга оширилиши ҳозирча очиқланмаган.
Президент электр таъминоти барқарорлигини таъминлаш ва электр энергияси таннархини пасайтириш мамлакатга янги инвестицияларни жалб қилишда муҳим омил эканини қайд этган.
Айни пайтда Ўзбекистондаги биринчи интеграциялашган АЭС Жиззах вилоятининг Фориш туманида қурилмоқда. Лойиҳа иккита ВВЭР-1000 3+ авлод реактори ҳамда ҳар бири 55 МВт қувватга эга иккита РИТМ-200Н реакторидан иборат бўлади.
Станция тўлиқ қувватга чиққач, йилига қарийб 15,4 миллиард киловатт соат электр энергияси ишлаб чиқариши ва бу мамлакат умумий электр истеъмолининг 15 фоизидан ортиғини қоплаши кутилмоқда.
Реактор биноси учун бетон асос тайёрлаш ишлари 2026 йил март ойида бошланган. Июнь ойида эса Президент Шавкат Мирзиёев ва Россия президенти Владимир Путин видеоконференция орқали биринчи энергоблок қурилишини бошлашга старт берганди.
Изоҳлар мавжуд емас