Ўзбекистон, Тошкент - Batafsil.uz. Ўзбекистонда иккинчи ва учинчи атом электр станцияларини қуриш режалари бор. Иккинчи АЭСни барпо этиш масаласи янги ҳамкорлар ва инвесторлар билан муҳокама қилинади. Бу ҳақда Президент Шавкат Мирзиёев 16 октябрь куни ёқилғи-энергетика соҳасидаги инвесторлар билан очиқ мулоқотда маълум қилди.
Давлат раҳбарининг таъкидлашича, мамлакатда уран ишлаб чиқариш ҳажми ошиб бормоқда, соҳага катта инвестициялар киритилган ва зарур тажриба тўпланган.
"Биринчи атом электр станцияси қурилишини бошладик. Иккинчи ва учинчисини қуриш бўйича ҳам режаларимиз бор. Эртага янги ҳамкорларимиз ва инвесторлар билан иккинчи атом электр станциясини қуриш масаласини муҳокама қиламиз", — деган Мирзиёев.
Ҳозирча иккинчи ва учинчи станцияларнинг жойлашуви, қуввати, технологияси ҳамда қурилиш муддатлари ҳақида қўшимча маълумот берилмаган.
Ўзбекистондаги биринчи атом электр станцияси Жиззах вилоятининг Фориш туманида Россия билан ҳамкорликда барпо этилмоқда. Лойиҳа кичик қувватли модулли реакторлар ва йирик қувватли атом энергетикасини бирлаштирган интеграциялашган станцияни назарда тутади.
Расмий маълумотларга кўра, 2026 йил 4 июнь куни Шавкат Мирзиёев ва Россия Президенти Владимир Путин станциянинг биринчи энергоблоки қурилишига старт берган.
2 сентябрь куни давлат раҳбарига лойиҳанинг амалга оширилиши бўйича ҳисобот тақдим этилган. Ўша вақтда реактор биноси учун котлован қазиш ишлари якунланган, бир миллион куб метрдан ортиқ тупроқ чиқарилган эди. Қурилиш майдонида 450 нафар ишчи ва мутахассис фаолият олиб бораётгани маълум қилинган.
2026 йил сентябрь ойида Сербия Президенти Александр Вучич Ўзбекистон иккинчи атом электр станциясини Хитой билан ҳамкорликда қуришни режалаштираётганини айтган эди. У бу ҳақда Шавкат Мирзиёев билан суҳбати мазмунини баён қилган. Кейинроқ давлат ўзи ҳам бу масалага тўхталган.
Изоҳлар мавжуд емас