Ўзбекистон, Тошкент - Batafsil.uz. Ўзбекистоннинг Эфиопиядаги биринчи элчиси этиб тайинланган Ашраф Хўжаев мамлакат Президенти Тайе Атске-Селассиега ўз ишонч ёрлиқларини топширди. Маросим доирасида бўлиб ўтган учрашувда икки давлат ўртасидаги ҳамкорликни ривожлантириш истиқболлари атрофлича муҳокама қилинди.
Эфиопия раҳбари Ўзбекистон элчисининг тайинланишини мамнуният билан кутиб олиб, бу қадам икки томонлама муносабатларнинг изчил ривожланишига ҳамда амалий алоқаларнинг кенгайишига хизмат қилишини таъкидлаган. Ўз навбатида, Ашраф Хўжаев Президент Шавкат Мирзиёевнинг самимий саломи ва энг эзгу тилакларини етказиб, ўзаро манфаатли иқтисодий ҳамкорликни кенгайтиришга тайёр эканини билдирган.
Маълумот ўрнида, Ашраф Хўжаев 2024 йилнинг февраль ойидан буён Ўзбекистоннинг Қатардаги элчиси сифатида фаолият юритиб келмоқда. Шунингдек, у 2025 йилнинг октябридан эътиборан ўриндошлик асосида Ўзбекистоннинг Жанубий Африка Республикасидаги элчиси сифатида ҳам аккредитациядан ўтган эди. Эндиликда у ушбу вазифалари билан бир қаторда Ўзбекистоннинг Эфиопиядаги элчиси вазифасини ҳам бажаради.
Ўзбекистон ва Эфиопия ўртасидаги расмий дипломатик муносабатлар 1996 йил 15 июлда ўрнатилган бўлиб, ушбу тайинлов икки мамлакат алоқаларида янги саҳифа очмоқда.
Изоҳлар мавжуд емас