Ўзбекистон, Тошкент - Batafsil.uz. АҚШ Олий суди федерал чегара агентларига мамлакатда қонуний доимий яшаш мақомига (LPR) эга бўлган грин-карта соҳибларини депортация қилиш ҳуқуқини берувчи муҳим қарор қабул қилди. Халқаро ОАВларнинг хабар беришича, мазкур тартиб маълум бир жиноятларни содир этишда гумон қилинаётган шахсларга нисбатан қўлланилади.
Янги суд қарорига кўра, чегара хизмати ходимлари бирор-бир жиноят бўйича асосли шубҳа ёки "аниқ ва ишончли далиллар" топсалар, грин-карта эгасининг АҚШ ҳудудига киришини тақиқлашлари мумкин. Энг эътиборли жиҳати, бунинг учун агентлардан шахснинг айбдорлигини тасдиқловчи қатъий ва расмий далилларни тақдим этиш талаб қилинмайди. Бу эса АҚШга кириш портлари (назорат-ўтказиш пунктлари) орқали қайтиб келаётган шахсларнинг доимий яшовчи мақомини бекор қилиш жараёнини сезиларли даражада соддалаштиради.
Амалдаги иммиграция қонунчилигига кўра, АҚШдан қисқа муддатга қонуний равишда чиқиб кетган грин-карта эгаларининг юртга қайтиб кириши кафолатланган эди. Бунда истисно тариқасида фақат суд томонидан айби исботланган ёки жиноятини ўзи тан олган шахсларгина тўсиққа учрарди. Олий суднинг бир нечта судьялари ушбу янги қарорга қарши чиқиб, ҳукумат аввал фуқаронинг жиноят содир этганини расман исботлаши, шундан кейингина унинг мақомини бекор қилиши кераклигини таъкидлашган бўлса-да, қарор кучга кирган.
Аввалроқ АҚШ Президенти Дональд Трамп мамлакатдаги университетларда содир этилган қонли ҳужумларда гумонланувчи шахслар айнан Грин-карта орқали келгани маълум бўлгач, Диверсификация визаси (DV) дастурини тўхтатиш ҳақида кўрсатма бергани ҳақида хабар берган эдик.
Изоҳлар мавжуд емас