Ўзбекистон, Тошкент - Batafsil.uz. Андижон вилоятида Қурилиш ва уй-жой коммунал хўжалиги соҳасидаги ҳудудий назорат инспекциясининг шўба бошлиғи хизмат мавқеини суиистеъмол қилган ҳолда пора олиш вақтида ушланди.
Маълум қилинишича, у Андижон шаҳридаги савдо дўконида ичимлик сувидан ноқонуний фойдаланиш ҳолати бўйича тузилган далолатнома асосида етказилган 680 миллион сўмлик зарар миқдорини камайтириб бериш ва маъмурий жазони енгиллаштириш ваъдаси эвазига 30 миллион сўм талаб қилган.
Давлат хавфсизлик хизмати ва ҳуқуқни муҳофаза қилувчи органлар томонидан ўтказилган тезкор тадбир давомида у талаб қилинган пулни олган вақтида ашёвий далиллар билан қўлга олинган.
Шунингдек, бошқа ҳолатда тижорат банкларидан бирининг Асака тумани филиалида ишловчи бош менежер фуқарога йирик кредит ажратиб бериш эвазига пора талаб қилгани аниқланган. У фуқародан босқичма-босқич 7800 доллар олган вақтида ушланган.
Ҳозирда ҳар икки ҳолат бўйича жиноят ишлари қўзғатилиб, тергов ҳаракатлари олиб борилмоқда.
Изоҳлар мавжуд емас