Ўзбекистон, Тошкент - Batafsil.uz. Қарши шаҳридаги "Чўлқувар" маҳалласида 19 ёшли йигит профилактика инспекторлари томонидан куч ишлатилиб ушлангани ва калтаклангани ҳақида ижтимоий тармоқларда видеомурожаат тарқалди. Мурожаатда йигитнинг опаси воқеа унинг соч турмаги сабаб юз берганини, ҳуқуқни муҳофаза қилувчи органлар ходимлари уни "террорчига ўхшаши"ни билдирганини айтган.
Қайд этилишича, воқеа 9 сентябрь куни эрталаб, йигит ишга кетаётган вақтда содир бўлган. Унинг олдига икки нафар профилактика инспектори келган ва узун сочи туфайли унга шубҳа билан қараган.
Йигит ходимлар билан боғлиқ вазиятни мобил телефони орқали тасвирга олишга уринган. Мурожаат муаллифининг таъкидлашича, шундан кейин унга нисбатан жисмоний куч ишлатилган.
Унинг айтишича, воқеага гувоҳ бўлган қўшнилар олдида йигитни бўғишган, кейин эса уни мажбуран хизмат автомобилига солиб, олиб кетишган. Қўллари кишанланган ҳолда тушунтириш хати ёздирилгани айтилмоқда
Мурожаат муаллифининг билдиришича, йигит дастлаб таянч пунктига, кейин эса туман ички ишлар бўлимига олиб борилган.
У ерда йигит қўллари кишанланган ҳолда тушунтириш хати ёзишга мажбур қилингани айтилмоқда. Тушунтириш хатида у гўёки ходимларга нисбатан ҳақоратли сўзлар ишлатгани ва уларнинг қонуний талабларига қаршилик кўрсатгани қайд этилган.
Мурожаат муаллифи эса ушбу ҳолат бошқача кечганини таъкидлаган ва ходимлар томонидан куч ишлатилганини айтган.
Тарқалган видеокадрларда 19 ёшли йигитнинг юзида кўкаришлар, бурун ва бош қисмида жароҳатлар, орқа ҳамда елкасида зарба излари борлиги кўринади. Шунингдек, унинг сочлари юлиб олингани айтилмоқда.
Қиз ҳуқуқни муҳофаза қилувчи органлар ходимларининг ҳаракатларига ҳуқуқий баҳо беришни сўраб, Ўзбекистон президенти ва давлат органлари раҳбарларига мурожаат қилган.
У ходимларни хизмат ваколатидан ошиш ва йигитга нисбатан зўравонлик ишлатишда айблаган.
Ҳозирча Қашқадарё вилояти ИИБ ёки Ўзбекистон Ички ишлар вазирлиги ушбу ҳолат юзасидан расмий муносабат билдирмаган.
Изоҳлар мавжуд емас