Ўзбекистон, Тошкент - Batafsil.uz. Қашқадарё вилоятининг Шаҳрисабз туманида кўплаб транспорт воситалари иштирокида йирик йўл-транспорт ҳодисаси содир бўлди. Дастлаб, машиналар 11 та эканлиги айтилган эди.
Вилоят ИИБ ЖХХ ЙҲХБ маълумотига кўра, ҳодиса 3 июль куни соат 14:30 ларда Шаҳрисабз туманидаги 70V010 автомобиль йўлининг 22-километрида юз берган.
Дастлабки маълумотларга кўра, HOWO русумли юк автомобилининг тормоз тизимида носозлик юзага келган. Оқибатда юк автомобили ўзи билан бир йўналишда ҳаракатланаётган жами 9 та транспорт воситаси билан тўқнашган.
Занжирли тўқнашувда 2 та Lacetti, Tracker-2, Nexia-1, Nexia-3, Matiz, Damas ва Spark русумли автомобиллар иштирок этган.
Тўқнашув зарбаси оқибатида Nexia-1 автомобили йўл четида бўлган пиёдани уриб юборган. Жабрланган пиёдага воқеа жойида шифокорлар томонидан биринчи тиббий ёрдам кўрсатилган.
Ҳозирда мазкур йўл-транспорт ҳодисаси юзасидан Қашқадарё вилояти ИИБ Жамоат хавфсизлиги хизмати Йўл ҳаракати хавфсизлиги бошқармаси масъул ходимлари томонидан суриштирув ишлари олиб борилмоқда.
Изоҳлар мавжуд емас