Ўзбекистон, Тошкент - Batafsil.uz. Ижтимоий тармоқларда Бухоро шаҳрида олинган ва жамоатчиликнинг кескин эътирозига сабаб бўлган видеолавҳа тарқалди. Видеода тахминан маст ҳолатда бўлган эркак мактаб ўқувчиси бўлган қизчанинг ёнида жинсий характердаги уятсиз ва ахлоқсиз ҳаракатларни содир этгани акс этган.
Ижтимоий тармоқ фойдаланувчилари ҳуқуқ-тартибот органлари ушбу ҳолатни зудлик билан ўз назоратига олишини ва ҳуқуқбузарга нисбатан қонунчиликда назарда тутилган энг оғир чоралар кўрилишини талаб қилмоқда.
Қайд этиш жоизки, охирги йилларда Ўзбекистонда вояга етмаганлар ва аёлларни зўравонлик ҳамда тажовузлардан ҳимоя қилиш бўйича қонунчилик сезиларли даражада кучайтирилган.
Хусусан, Маъмурий жавобгарлик тўғрисидаги ва Жиноят кодексларига киритилган ўзгартиришларга кўра, жамоат жойларида шаҳвоний шижоат кўрсатиш ва уятсиз-ҳаёсиз ҳаракатлар содир этганлик учун жавобгарлик қатъийлаштирилган.
Шунингдек, вояга етмаган шахсга нисбатан жинсий дахлсизликка ва эркинликка қарши содир этилган ҳар қандай ножўя ёки уятсиз ҳаракатлар оғир жиноят сифатида таснифланади ҳамда муддатидан илгари шартли озод қилиш қўлланилмайдиган жазо турларини назарда тутади.
Ҳозирча ҳолат юзасидан расмий муносабат билдирилмаган.
Олдинроқ Тошкентда ҳам аёлга нисбатан уятсиз ҳаракатлар қилган шахс қўлга олинганди.
Изоҳлар мавжуд емас