Ўзбекистон, Тошкент - Batafsil.uz. 2026-йил 1-октябр ҳолатига кўра, Ўзбекистон тижорат банкларида муаммоли кредитлар (NPL) умумий ҳажми 25 триллион сўмдан ошди. Бироқ мамлакатдаги айрим банклар портфелида муаммоли қарзлар миқдори рекорд даражада юқори бўлса, баъзи молия муассасаларида бу кўрсаткич нолга тенглигича қолмоқда.
Тақдим этилган расмий маълумотларга кўра, банклар кесимидаги энг эътиборга молик ва зиддиятли кўрсаткичлар турлича. Фоиз нисбатида энг катта муаммоли кредит "Madad Invest bank"га тўғри келади — банкнинг 587 миллиард сўмлик жами кредитларидан нақ 43,4 фоизи (255 миллиард сўм) муаммоли ҳисобланади. Шунингдек, "Poytaxt bank"да инқирозли улуш 13,8 фоизни (103 миллиард сўм), "Tibisi bank"да эса 13,4 фоизни (1 триллион 36 миллиард сўм) ташкил этган.
Миқдор ва ҳажм жиҳатидан энг катта кўрсаткичга эга банк сифатида "Ўзмиллийбанк" пешқадамлик қилмоқда — унинг умумий кредитлари 104 триллион 78 миллиард сўмни ташкил этади, шундан 3 триллион 107 миллиард сўми ёки 3,0 фоизи муаммоли. Муаммоли кредитларнинг номинал пул миқдори бўйича эса энг юқори рақам "Агробанк"га тўғри келади: унда 3 триллион 180 миллиард сўмлик (3,3 фоиз) кредитлар муаммоли мақомда қолмоқда.
Молия тизимида ҳеч қандай муаммоли кредитга эга бўлмаган энг "тоза" банклар сифатида KDB Bank Oʻzbekiston (4 041 миллиард сўмлик портфель), Oktobank (833 миллиард сўм) ва Uzum bank (450 миллиард сўм) қайд этилиб, уларнинг кўрсаткичи 0,0 фоизни ташкил этган.
Маълумот учун, 2026 йилнинг биринчи ярмида тижорат банкларидаги муаммоли кредитлар ҳажми 4,9 триллион сўмга кўпайиб, 22,9 триллион сўмга етганди. Ўсишнинг қарийб 74 фоизи давлат иштирокидаги банклар ҳиссасига тўғри келган эди.
Июль ойидан бери бу турдаги кредит 2,1 триллион сўмга ошган.
Изоҳлар мавжуд емас