"Давлат мукофотлари борлиги масъулиятдан озод қилмайди". Суд ҳокимияти машҳур самарқандлик тадбиркор Абдужалилов нега қамалганини очиқлади

Ўзбекистон, Тошкент - Batafsil.uz. Олий суд Толибхон Абдужалилов иши бўйича расмий изоҳ эълон қилди. Ушбу иш кенг жамоатчилик эътиборини тортган. Суд ҳокимияти машҳур самарқандлик тадбиркорнинг нега озодликдан маҳрум қилингани ҳақида тўлиқ маълумот берди. Бу баёнот ижтимоий тармоқларда пайдо бўлган, тадбиркорнинг ўғли иштирокидаги суд залидан олинган видеога жавоб сифатида берилди. Видеода ўғил отасининг давлат мукофотларини намойиш қилар экан, суд ҳукмига норозилик билдириб, залдан чиқиб кетади.

Эслатиб ўтамиз, тадбиркор ва унинг икки ҳамкори — Алишер Абдумаликов ҳамда Шерзод Қўзибоев — Жиноят кодексининг 167-моддаси (ўзлаштириш ёки талон-торож қилиш) ва 228-моддаси (ҳужжатларни сохталаштириш) бўйича айбдор деб топилган. Текширув жараёнида улар “Агробанк” томонидан қишлоқ хўжалиги маҳсулотларини қайта ишлаш ускуналарини харид қилиш учун ажратилган 7 миллиард сўмлик имтиёзли кредит маблағларини талон-торож қилгани аниқланган.

Суд хулосасига кўра, ускуналар тўлиқ етказиб берилмаган, айрим техникалар эски ҳолда бўлган, етказиб беришга оид ҳужжатлар эса сохта экани аниқланган.

Айбланувчилар ушбу сохта ҳужжатлардан фойдаланиб, банк маблағларини қўлга киритган ва уларни нақд пулга айлантирган. Натижада кредит қайтарилмаган.

Олий суд таъкидлашича, фуқаронинг давлат мукофотларига эга бўлиши уни жиноий жавобгарликдан озод этмайди.

"Жиноят содир этган ҳар қандай шахс, унинг хизматлари ёки жамиятдаги мавқеидан қатъи назар, қонун олдида тенгдир. Афсуски, Т. Абдужалиловнинг айбсизлигига оид даъволар жиноят ишини кўриб чиқиш жараёнида тасдиқланмади", — дейилади суд изоҳида.

Шунингдек, суд ҳокимияти Абдужалилов ва унинг ҳамкорлари Жиноят кодексининг 167-моддаси (ўзлаштириш ёки талон-торож қилиш) бўйича етказилган зарарни қоплаш орқали енгилроқ жазо олиш имкониятига эга бўлишганини эслатди.

Аввалроқ суд томонидан банк фойдасига умумий 7 миллиард сўмдан ортиқ суммадаги асосий қарз ва фоизларни ундириб бериш белгиланган, бироқ ушбу қарор ижро этилмаган.

Олий суд, шунингдек, тадбиркорнинг ўғли иштирок этган видеода ундирилиши керак бўлган сумма 14 миллиард сўм деб кўрсатилганига эътибор қаратди. Шу муносабат билан, суд бу ҳолат эҳтимолан ҳиссиётлар таъсирида юзага келган ва нотўғри талқин қилинган, деб ҳисоблайди.

Изоҳ якунида таъкидланишича, ҳозирча ҳукм қонуний кучга кирмаган ва у апелляция тартибида шикоят қилинши мумкин.