Ўзбекистон, Тошкент - Batafsil.uz. Россиянинг Иркутск шаҳар суди 17 ёшли қизини шафқатсизларча калтаклаб, тўртинчи қават ойнасидан улоқтириб юборган Ўзбекистон фуқаросига нисбатан ҳукм ўқиди. Суд уни айбдор деб топиб, 7 йил-у 6 ой муддатга қатий режимдаги колонияга озодликдан маҳрум қилди. Оғир тан жароҳатлари олган қиз кўплаб суяк сингишлари билан шифохонага ётқизилган.
Тергов маълумотларига кўра, ҳодиса 2024 йилнинг ноябрь ойида содир бўлган. Эркак кўчада машинада кетаётиб, аслида мактабда дарсда бўлиши керак бўлган 17 ёшли қизини бош кийимсиз юрганини кўриб қолган. Отаси машинани тўхтатиб, қизни урган ва куч ишлатиб автомобилга ўтирғизган.
Уйга келгач, эркак қизини калтаклашда давом этган, жумладан, уни металл шланг билан урган. Можаро авжига чиққан вақтда у вояга етмаган қизини хонадоннинг 4-қаватидаги очиқ деразасидан улоқтириб юборган.
Оқибатда қиз турли даражадаги оғир жароҳатлар олиб, касахонага олиб кетилган. Шифохонада даволанаётган вақтида у ҳуқуқ-тартибот идоралари ходимларига содир бўлган воқеа тафсилотларини сўзлаб берган ва отасига қарши кўрсатма берган.
Мазкур ҳолат юзасидан қотилликка суиқасд қилиш ва қийноққа солиш моддалари бўйича жиноят иши қўзғатилган эди. Судланувчи ўз айбини тан олмаган бўлса-да, суд давлат айбловчисининг позициясини маъқуллаган ва тегишли жазо тайинлаган.
Эслатиб ўтамиз, аввалроқ Қашқадарё вилоятининг Муборак туманида 15 ёшли қиз отаси томонидан калтакланиши оқибатида вафот этган эди. Бунга қизнинг рухсатсиз 400 минг сўм олгани сабаб бўлган.
Изоҳлар мавжуд емас