Ўзбекистон, Тошкент - Batafsil.uz. Ижтимоий тармоқларда Наманган вилоятининг Поп туманида фаолият юритувчи якка тартибдаги тадбиркорнинг маҳаллий жиноий гуруҳ таҳдидларидан шикоят қилган видеомурожаати тарқалди. Видеоларда айтилишича, улар Поп туманини ўз назоратига олишган.
Тадбиркорнинг сўзларига кўра, туманда узоқ йиллардан бери "Санжар патир йигитлари" номи билан танилган, 20 га яқин аъзодан иборат ноқонуний гуруҳ тадбиркорларга босим ва таҳдид қилиб келмоқда. Мурожаатчи ушбу гуруҳнинг қўйган шартларига кўнмагани боис, 2026 йил 14 май куни унинг савдо дўконига келиб, очиқчасига ўлим билан таҳдид қилишган.
Видеоларда қаршиликка қарамасдан ва ҳеч қандай расмий формадаги шахслар иштирокисиз ташқи рекламаларни бузиб ташлаётган эркаклар кўринган. Атрофда ҳеч ким бунга қаршилик кўрсата олмаган. Улар дўконнинг ташқи реклама воситаларини ечиб олиб, кейин мажбуран олиб кетишган.
Жамоатчилик фаоллари ва тармоқ кузатувчилари мазкур ҳолат бўйича ҳуқуқни муҳофаза қилувчи органлардан тезкор муносабат кутишмоқда. Тадбиркорнинг ҳаёти хавф остида экани инобатга олиниб, вазиятни зудлик билан назоратга олиш лозимлиги таъкидланмоқда.
Изоҳлар мавжуд емас