Ўзбекистон, Тошкент - Batafsil.uz. Оҳангарон шаҳар суди патруль-пост хизмати (ППХ) ходимига нисбатан туҳмат тарқатган 18 ёшли йигит ва унинг икки танишига нисбатан қарор чиқарди. Улар 7 суткага маъмурий қамоқ жазосига тортилди.
Суд материалларига кўра, мазкур шахс 27 апрелдан 28 апрелга ўтар кечаси ижтимоий тармоқларда ППХ ходими гўёки 14 ёшли қиз шаънига тажовуз қилгани ҳақида видеоролик тарқатган. Текширув давомида ушбу айбловлар тўлиқ уйдирма экани аниқланган.
Ҳуқуқбузар ўз айбини тан олган ва шахсий адоват сабаб ходимга туҳмат қилганини билдирган. Шунингдек, у омма олдида узр сўраган.
Маълум қилинишича, вазият ички ишлар бўлимига чақирилганда янада мураккаблашган. Йигит ҳуқуқни муҳофаза қилувчи органлар қонуний талабларини бажаришдан бош тортган ва маъмурий бинода можаро келтириб чиқарган.
Шу билан бирга, ҳозирча иш бўйича текширувлар тўлиқ якунланмаган. Ҳуқуқни муҳофаза қилувчи органлар томонидан интернет орқали ёлғон маълумот тарқатиш ва ички ишлар ходимини қасддан обрўсизлантириш ҳолатлари юзасидан қўшимча тергов ҳаракатлари олиб борилмоқда.
Бундан ташқари, видеони тасвирга олиш жараёнида гуруҳ томонидан транспорт воситасига зарар етказилгани ҳам ўрганилмоқда. Бу ҳолат бўйича ҳам уларга нисбатан жавобгарлик масаласи кўриб чиқилиши мумкин.
Ҳуқуқни муҳофаза қилувчи органлар бу каби фейк ахборотлар орқали жамоатчилик фикрини манипуляция қилиш уринишлари жазосиз қолмаслигини таъкидлаган. Ушбу ҳолат интернетда ёлғон маълумот тарқатганлик учун жавобгарлик муқаррар эканини яна бир бор эслатади.
Изоҳлар мавжуд емас