Ўзбекистон, Тошкент - Batafsil.uz. Жорий йилнинг 7 февраль куни Самарқанддаги хусусий клиникалардан бирида навбатсиз кириш истагида бўлган фуқаро ва невролог ўртасидаги келишмовчилик содир бўлди. Ҳолат жисмоний зўравонлик билан якун топган. Бу ҳақида жабрланувчи Batafsil.uz мухбирига маълум қилди.
Воқеа тафсилотларига кўра, хусусий клиника неврологи ўз хизмат вазифасини бажараётган вақтда бемор болакайни олиб келган шахс томонидан зўравонликка учраган.
Жанжалга шифокорнинг навбат кутаётган бошқа беморлар, хусусан, уч нафар фарзанди билан келган аёл борлигини айтиб, навбатсиз кўришни рад этгани сабаб бўлган. Натижада фуқаро ўз фарзандини эшикдан чиқариб юбориб, тиббиёт ходимини дўппослаган, унга тан жароҳат етказган.
Кадрларда кўриниб турганидек, мазкур жараён атрофдагилар ва тиббиёт ходимларининг кўз ўнгида содир бўлган. Тегишли орган ходими ҳам воқеа жойида бўлган.
Жабрланувчи ҳолат бўйича тегишли органларга ариза билан мурожаат қилган ва тиббий экспертизадан ўтган.
Эслатиб ўтамиз, аввалроқ Тошкентда навбатчилик вақтида беморнинг яқини томонидан аёвсиз калтакланган шифокор аёл икки йилдан буён адолат излаб юргани ҳақида хабар қилган эдик. Унга оғир жароҳат етказган шахс нафақат жиноий жавобгарликдан қутулиб қолган, балки ҳозирда ички ишлар органларида маҳалла ҳуқуқ-тартибот ходими (участковой) сифатида фаолият юритиб келган.
Воқеа 2023 йилнинг 6 ноябрь куни Юнусобод туманидаги 7-сонли шифохонада содир бўлган. Ўшанда 22 ёшли бемор ва унинг яқинлари дарҳол шифохонага ётқизишни талаб қилиб, навбатчи шифокорга ҳужум қилишганди.
Изоҳлар мавжуд емас