Ўзбекистон, Тошкент - Batafsil.uz. Бош прокуратура ҳамда Иқтисодий жиноятларга қарши курашиш департаментининг Шахсий хавфсизлик бошқармалари томонидан ўтказилган тезкор тадбирлар давомида йирик фирибгарлик ва товламачилик ҳаракатларини содир этиб келган сохта ходим қўлга олинди. У ўзини гўёки прокуратура ва департамент тизимида юқори лавозимларда ишловчи шахс сифатида таништириб, фуқароларни чув тушириш ва тадбиркорларни қўрқитиш билан шуғулланган.
Аниқланишича, ушбу шахс бир фуқаронинг яқин танишига нисбатан ўтказилган тезкор-қидирув тадбиридан унумли фойдаланиб қолмоқчи бўлган. Ўша тадбир давомида вақтинча олиб қўйилган жами 292 дона, қиймати 462,9 миллион сўмлик тилло буюмларни гўёки ўз ваколати орқали қайтариб беришни ваъда қилган. Бундан ташқари, тергов ҳаракатларини мазкур танишининг фойдасига ҳал қилиб бериш эвазига фирибгарлик йўли билан 2500 долларни қўлга киритган. Аслида эса мазкур ҳолат бўйича жиноят иши аллақачон якунланиб, кўриб чиқиш учун судга юборилган бўлган.
Суриштирув жараёнида сохта ходимнинг бошқа қонунбузарликлари ҳам фош этилган. У Гулистон шаҳрида жойлашган "Шукран" номли чойхонада доимий равишда овқатланиб, тўлов қилишдан бош тортиб келган. Чойхона маъмурияти ҳисоб-китоб қилишни сўраган вақтда, у ўзини гўёки Департаментнинг Гулистон шаҳар бўлими бошлиғи деб таништирган. Тадбиркорга агар пул талаб қилинса, фаолияти юзасидан солиқ текширувларини ташкил этиб, чойхонани бутунлай ёптириб ташлашини айтиб, уларни қўрқитиб келган.
Мазкур ҳолат юзасидан 2026 йил 18 июль куни Департаментнинг Гулистон шаҳар бўлими томонидан ушбу шахсга нисбатан Жиноят кодексининг 168-моддаси 3-қисми "б" банди (такроран ёки хавфли рецидивист томонидан содир этилган фирибгарлик) билан жиноят иши қўзғатилган. Гумонланувчи Жиноят-процессуал кодексининг 221-моддаси тартибида ушланган ва ҳозирда тергов ҳаракатлари олиб борилмоқда.
Бош прокуратура фуқароларни доимий равишда огоҳ бўлишга чақирган. Ўзини турли давлат органларининг масъул ходими сифатида таништириб, муайян хизматлар ёки муаммоларни ҳал этиш эвазига пул талаб қилувчи шахсларга ҳеч қачон ишонмаслик кераклиги таъкидланган.
Бундан олдин ҳам ДХХ ва Президент администрациясининг сохта ходими 3,5 йилга қамалганди.
Изоҳлар мавжуд емас