Ўзбекистон, Тошкент - Batafsil.uz. Тошкент шаҳрида Суриядаги террорчилик гуруҳлари аъзосининг чақириғи билан хорижга йўл олишни режалаштирган ва яқинларини "жиҳод"га чорлаган бир гуруҳ шахслар қўлга олинди. Гуруҳ етакчиси Муҳаммадали 6 йил муддатга озодликдан маҳрум этилган.
Аниқланишича, Қорақамиш мавзесида яшаган ва 2018 йилда Сурияга чиқиб кетган Ҳасан исмли шахс Инстаграм орқали мактаб давридаги таниши, 30 ёшли Муҳаммадали билан боғланган. Унинг таъсирига тушган Муҳаммадали оиласи ва уч нафар фарзандини ташлаб, Қозоғистон ва Туркия орқали Сурияга кетиш режасини тузган. У ҳатто йўл харажатлари учун ўз автомобилини сотишга уринган ва бирга ишлайдиган қариндошларига ҳам Сурияга бориш "фарз" экани ҳақида нотўғри маълумотлар тарқатган.
Ҳуқуқни муҳофаза қилувчи органлар томонидан ўтказилган тезкор тадбир натижасида беш нафар шерик қўлга олинган. Текширувлар давомида уларнинг диний экстремистик мазмундаги маърузаларни тинглагани ва террорчилик ташкилотлари ғояларини қўллаб-қувватлагани тасдиқланган. Судда Муҳаммадали ўз айбига иқрор бўлиб, ота-онасининг қаршилигига қарамай, "жиҳод" қилиш мақсадида адашганини тан олган.
Суд ҳукмига кўра, Муҳаммадали Ўзбекистон Республикаси Жиноят кодексининг 156-моддаси (миллий, ирқий, этник ёки диний адоват қўзғатиш) ва 244-2-моддаси (диний экстремистик, сепаратистик, фундаменталистик ёки бошқа тақиқланган ташкилотлар тузиш, уларга раҳбарлик қилиш, уларда иштирок этиш) билан айбдор деб топилган. Унга узил-кесил 6 йил озодликдан маҳрум қилиш жазоси тайинланган.
Шериклари эса жиноятни яширганлик ва экстремистик фаолиятда иштирок этганлик учун тегишли тартибда қонуний жазога тортилганлар.
Мутахассислар ёшларни ижтимоий тармоқлардаги шубҳали чақириқлардан эҳтиёт бўлишга ва Ислом ниқоби остидаги ёлғон ғояларга алданиб, ўз ҳаётларини ва оилаларини вайрон қилмасликка чақирмоқда.
Изоҳлар мавжуд емас