Ўзбекистон, Тошкент - Batafsil.uz. Шерободлик имконияти чекланган Муқаддас Алимованинг меҳнатини камситган масъуллар ва унинг маҳсулотларини "тайёр сотиб олинган" деб даъво қилган телеканал ва ёлғон гувоҳлик берган қўшнига нисбатан жамоатчилик қонуний чора кўришни талаб қилмоқда.
Шеробод туманида яшовчи, имконияти чекланган бўлишига қарамай, ўз меҳнати билан даромад топишга интилаётган Муқаддас Алимова атрофидаги можаро янги босқичга чиқди. Аввалроқ аёл 200 та болалар кийими тиккани, бироқ маҳаллий ҳокимият ва Ижтимоий хизмат маркази ходимлари унинг меҳнатини "10 минг сўмга ҳам олмайди" деб камситишгани ҳамда ҳақорат қилишганини маълум қилган эди.
Ушбу ҳолат ижтимоий тармоқларда кескин эътирозларга сабаб бўлгач, Сурхондарё миллий телерадиокомпанияси воқеани ўрганиш учун репортаж тайёрлаган, бироқ телеканалнинг холислиги шубҳа остида қолди.
Телеканал томонидан тайёрланган лавҳада аёлнинг қўшниси Ҳилола Элмуродова интервью бериб, Муқаддас аслида тикувчилик билан шуғулланмаслиги, балки тайёр "Қўқон молларини" олиб келиб сотишини иддао қилган. Бу эса жамоатчиликнинг янада кучли ғазабига сабаб бўлган. Ижтимоий тармоқ фаоллари ва блогерлар воқеани мустақил ўрганиб, аёлнинг уйида иш жараёнини, мато қийтиқларини видеога олишган ва унинг ҳақиқатан ҳам моҳир тикувчи эканини исботлашган. Улар инстаграмм тармоғида қизнинг кийим тикиш жараёнини улашган.
Шунингдек, унинг устози, "Havas fashion" раҳбари Шаҳноза Ғуломжонова Муқаддас унинг махсус курсларида ўқиганини ва танловларда ғолиб бўлганини тасдиқлаган.
Шунга қарамай қўшни бир неча блогерларга ҳам Муқаддаснинг тикиш қила олмаслигини айтганини, бир неча бор уйига ташриф буйирганини, онаси ундан сўраганини айтган. Аммо қизнинг онаси ҳеч қандай ёрдам сўрамаганини айтган.
Можаро авж олгач, маҳаллий ҳокимият вакиллари аёлнинг маҳсулотларини сотиб олиш ва унинг фаолиятини расмийлаштиришга ваъда бера бошлади. Бироқ жабрланувчининг ўзи буларни "навбатдаги ваъдабозлик" деб баҳоламоқда. Муқаддас Алимова телеканал ва ёлғон гувоҳлик берганларга нисбатан қонуний чора кўришни сўраб мурожаат қилган. Таъкидлаш жоизки, аёл давлатдан моддий ёрдам сўрамаган, балки фақат ўз меҳнати маҳсулини сотишга шароит яратиб беришни илтимос қилган.
Жамоатчилик телерадиокомпанияга ва ёлғон гувоҳлик берган қўшнига нисбатан жазо талаб қилмоқда.
Изоҳлар мавжуд емас