Ўзбекистон, Тошкент - Batafsil.uz. Тошкент ҳокимлиги ижтимоий тармоқларда машҳур "тирик-китоб"нинг савдо жойи олиб қўйилгани ҳақида тарқалган хабарларни рад этди. Маъмуриятга кўра, сотувчи жойини ёзги таътил даврида харидорлар оқими камайгани сабабли ўзи ихтиёрий равишда ўзгартирган.
Ҳокимлик маълум қилишича, аввалроқ шаҳар ҳокимлиги ва Ёшлар ишлари агентуси ташаббуси билан китоб сотувчи учун Олмазор туманидаги Талабалар шаҳарчаси ҳудудида доимий савдо нуқтаси ташкил этилган. Ушбу савдо жойи ҳозир ҳам фаолият юритмоқда ва ҳеч ким томонидан олиб қўйилмаган.
Расмий изоҳга кўра, ёзги таътил туфайли Талабалар шаҳарчасида харидорлар сони камайгани боис китоб сотувчи ўз ташаббуси билан вақтинча "Буюк Ипак йўли" метро бекати атрофига кўчган. Ҳокимлик бу унинг шахсий қарори эканини таъкидлаган.
Айни пайтда шаҳар ҳокимлиги китоб сотувчи учун "Буюк Ипак йўли" метроси яқинида қўшимча савдо жойини ташкил этиш имкониятини ўрганмоқда. Шу билан бирга, унинг Олмазор туманидаги аввалги савдо нуқтасидан фойдаланиш ҳуқуқи ҳам сақланиб қолади.
Ҳокимлик фуқароларни фақат расмий манбаларда эълон қилинадиган ахборотларга ишонишга чақирган.
Изоҳлар мавжуд емас