Ўзбекистон, Тошкент - Batafsil.uz. Instagram ижтимоий тармоғида Umr.Sham номи билан танилган блогер ўзининг ҳамкасби ва хонанда Мубина Аббосхоновага (Mubinlolo) нисбатан қотиллик ва жасадни яшириш саҳнаси акс этган видеони суратга олди ва тарқатди. Бунинг учун у қўлга олинди. Блогер хонанданинг ижодига билдирган муносабати давомида уни ўлдириш ва жасадини қора пакетга солишни ифодаловчи саҳналарни ҳам намойиш этган.
Маълум бўлишича, блогер хонанданинг клипига муносабат билдириб, унинг ижодини миллий маънавиятга зид деб баҳолаган. Шундан сўнг видеода хонандани ўлдириш, жасадини қора пакетга жойлаш ва кўмишга ишора қилувчи саҳналар намойиш этилган. Роликда фақат хонанда эмас, балки блогернинг қарашларига қўшилмайдиган бошқа инсонларга нисбатан ҳам зўравонлик ишоралари бўлган. Видео якунида эса Ўзбекистон давлат байроғи ва Ички ишлар вазирлиги байроғи кўрсатилган.
Воқеа жамоатчиликда кенг муҳокама қилингач, Тошкент шаҳар ИИББ ҳолатга муносабат билдирган. Олмазор тумани ички ишлар органлари ходимлари видео муаллифининг шахсини аниқлаган. Блогер эса ички ишлар ходимлари унга қонуний чора кўрилиши мумкинлигини тушунтирганидан сўнг қилмишидан пушаймонлигини билдириб, жамоатчиликдан узр сўраган.
Мазкур ҳолатга зўравонликка қарши курашувчи Nemolchi.uz лойиҳаси ҳам муносабат билдирган. Лойиҳа 4 ноябрь куниёқ ҳуқуқни муҳофаза қилувчи органларни видеога ҳуқуқий баҳо беришга чақирган. Унда бундай мазмундаги контент зўравонлик ва ўзбошимчалик билан жазолаш ғояларини тарғиб қилиши, жамоат хавфсизлигига таҳдид солиши мумкинлиги таъкидланган. Кейинчалик видео блогернинг саҳифасидан ўчирилган.
Айни вақтда Олмазор тумани ички ишлар органлари томонидан терговга қадар текширув олиб борилмоқда. Текширув якунида ҳолатга ҳуқуқий баҳо берилиб, қонуний қарор қабул қилиниши кутилмоқда. Айрим нашрларда блогер қўлга олингани ҳақида хабар берилган бўлса-да, ИИББнинг очиқ баёнотида унинг шахси аниқлангани ва текширув давом этаётгани айтилган.
Олдинроқ актриса ва блогер Нилуфар Ҳамидова жамоат жойидаги хатти-ҳаракатлари туфайли 7 суткага қамалганди.
Изоҳлар мавжуд емас