Ўзбекистон, Тошкент - Batafsil.uz. Тошкентда "Келес" темир йўл чегара божхона пости инспектори пора олишда гумонланиб қўлга олинди. Тергов маълумотларига кўра, у ҳужжатларни ноқонуний расмийлаштириш ва ўнта iPhone телефонларининг "IMEI" кодларини рўйхатдан ўтказиш учун 3 минг доллар олган.
Бош прокуратура ҳузуридаги Иқтисодий жиноятларга қарши курашиш департаменти хабарига кўра, тезкор тадбир Божхона қўмитаси билан ҳамкорликда ўтказилган.
Тергов маълумотларига кўра, Тошкент шаҳар божхона бошқармасининг "Келес" божхона пости инспектори белгиланган тартиб-таомилларни четлаб ўтиб, Ўзбекистонга олиб кирилган 10 дона "iPhone" мобил телефонига божхона ҳужжатларини расмийлаштиришни ваъда қилган. Бунинг учун у бошқа фуқароларнинг паспорт маълумотларидан фойдаланиб, қурилмаларнинг "IMEI" кодларини уларнинг номига рўйхатдан ўтказмоқчи бўлган.
Гумонланувчи 3 минг долларни олган вақтида ашёвий далиллар билан ушланган. Пуллар ашёвий далил сифатида мусодара қилинган.
Мазкур ҳолат юзасидан Жиноят кодексининг 210-моддаси (пора олиш) билан жиноят иши қўзғатилган. Тергов ҳаракатлари олиб борилмоқда.
Изоҳлар мавжуд емас