Ўзбекистон, Тошкент - Batafsil.uz. Ижтимоий тармоқларда кенг муҳокамаларга сабаб бўлган Тошкент мактабларидан биридаги воқеага расмий ҳуқуқий баҳо берилди. Текширув хулосасига кўра, ўқитувчи қонун доирасида ҳаракат қилган ва касб этикасини бузмаган деб топилди.
Эслатиб ўтамиз, аввалроқ Мирзо Улуғбек туманидаги 275-мактабнинг информатика ўқитувчисига нисбатан 9-синф ўқувчисига куч ишлатгани омили бўйича жиноят иши қўзғатилган эди. Бунга ижтимоий тармоқларда тарқалган видеоролик сабаб бўлганди. Кадрларда ўқитувчи дарс пайтида ўқувчининг боши ва танасига зарбалар бераётгани, атрофдагиларнинг аралашувига қарамай, ўз ҳаракатларини давом эттиргани акс этган эди.
Бироқ, расмий манбаларнинг хабар беришича, ўтказилган суриштирув ва ҳуқуқий баҳолаш натижасида педагог айбсиз деб топилди. Маълум бўлишича, у дарсда тартибни сақлаш ва синфдаги интизомни ҳимоя қилиш мақсадида қонун доирасида ҳаракат қилган.
Можаронинг тўлиқ видеоверсияси ўрганиб чиқилганда, муштлашувга айрим ўқувчиларнинг интизомни қўпол равишда бузгани ва ўқитувчига нисбатан ҳурматсизлик қилгани сабаб бўлгани аниқланди. Ўқувчилардан бири бир неча бор тажовузкорлик кўрсатган, дарсларга халақит берган ва педагогларни ҳақорат қилган.
Бундай хулқ-атворга йўл қўйиб берган ўқувчиларнинг ота-оналарига нисбатан маъмурий жавобгарлик чоралари кўрилди. Маълум бўлишича, бундан олдин ҳам улар мактабга бир неча бор чақирилган ва фарзандлари дарслардан қочгани ёки сабабсиз қатнашмагани учун маъмурий жавобгарликка тортилган экан.
Ўқитувчининг ўзи воқеага изоҳ берар экан, ўқувчини камситиш ёки унга зарар етказиш нияти бўлмаганини, шунчаки тажовузкорликни тўхтатиш ва дарсдаги тартибни сақлашга уринганини таъкидлади. Унинг сўзларига кўра, илгари ота-оналар педагогларни қўллаб-қувватлашарди, ҳозир эса баъзилар бўлаётган воқеаларни телефонга тасвирга олиб, ўқитувчиларни айблашга ҳаракат қилишмоқда.
Мутасаддилар чиқарилган якуний қарор холис текширув натижаларига асосланганини ва мактаб интизомига риоя қилиш нақадар муҳимлигини яна бир бор исботлашини айтиб ўтдилар.
Изоҳлар мавжуд емас