Ўзбекистон, Тошкент - Batafsil.uz. Тошкентда "Қўйлиқ" бозори яқинида ҳуқуқ-тартибот идоралари ходимлари опий ва гашиш каби оғир гиёҳванд моддаларнинг катта партиясини аниқлаб, мусодара қилди.
Махсус операция давомида Тошкент шаҳридаги Қўйлиқ бозори яқинида шубҳали тарзда тўхтаб турган Lacetti автомобили тезкор ходимлар томонидан гувоҳлар иштирокида кўздан кечирилди. Автомобилни Сурхондарё вилояти Сариосиё туманида яшовчи, муқаддам судланган 57 ёшли фуқаро бошқарган. Йўловчи Тошкент шаҳрида яшовчи 42 ёшли деновлик экан.
Транспорт воситаси кўздан кечирилганда, пластик идишда умумий оғирлиги 34,61 килограмм бўлган 30 дона гиёҳвандлик моддаси ўрамлари аниқланган. Улар орасида 12,96 килограмм опий ва 21,65 килограмм гашиш бўлган.
Тергов маълумотларига кўра, гиёҳванд моддалар мамлакатга хориждан контрабанда йўли билан олиб кирилган.
Жиноят иши контрабанда ва жуда кўп миқдорда гиёҳванд моддаларнинг ноқонуний айланиши моддалари бўйича қўзғатилган.
Гумонланувчилар қамоққа олинган. Тергов эҳтимолий шерикларнинг шахсини ва гиёҳванд моддаларни етказиб бериш йўлларини аниқламоқда.
Изоҳлар мавжуд емас