Ўзбекистон, Тошкент - Batafsil.uz. Тошкент шаҳрининг Миробод туманида болалар майдончаси ва спорт ўйингоҳлари ўрнида олиб борилган қурилиш ишлари юзасидан жиноят иши қўзғатилди. Бу ҳақда ҳуқуқни муҳофаза қилувчи органлар маълум қилди.
Маълум қилинишича, ўрганишлар давомида аввал "Маҳалла" хайрия жамоат фонди балансида бўлган ҳудуд кейинчалик Al-Latif Hearts Tower компанияси тасарруфига ўтказилгани ҳамда реконструкция ва қўшимча бино-иншоотлар қуриш учун тегишли рухсат ҳужжатлари расмийлаштирилгани аниқланган.
Бироқ, "Лолазор" маҳалласи аҳолиси мазкур ҳудудда янги қурилишга қарши чиққан. Шунингдек, "Маҳалла" хайрия жамоат фонди билан инвестор ўртасида тузилган инвестиция шартномаси ҳам бекор қилинган.
Шунга қарамай, 2026 йил июнь ойида фонд балансидаги 172 квадрат метрли бино бузиб ташлангани ва бу орқали давлат манфаатларига жиддий зарар етказилгани қайд этилган.
Мазкур ҳолат юзасидан 27 июль куни туман прокуратураси томонидан Al-Latif Hearts Tower компаниясининг мансабдор шахслари ва бошқа шахсларга нисбатан Жиноят кодексининг тегишли моддалари билан жиноят иши қўзғатилган.
Шунингдек, тергов доирасида жамиятнинг норасмий раҳбари сифатида тилга олинаётган Аслиддин Икромов гумон қилинувчи сифатида процессуал тартибда ушланган. Айни пайтда тергов ҳаракатлари давом этмоқда. Масъулларнинг ҳаракатларига ҳуқуқий баҳо бериш ҳамда болалар майдончасини аввалги ҳолатига қайтариш чоралари кўрилаётгани билдирилган.
Изоҳлар мавжуд емас