Ўзбекистон, Тошкент - Batafsil.uz. Нью-Йорк штати сиёсатчилари ва фаоллари хонанда Юлдуз Усмонованинг Брайтон-Бичда режалаштирилган концертига қарши кампания бошлади. Унинг антисемитик баёнотлари учун визасини аннуляция қилиш сўралмоқда.
Нью-Йорк штати губернаторлигига номзод Брюс Блейкман, штат Ассамблеяси депутатлари Майкл Новахов ва Алек Брук-Красни хонанданинг 9 май куни ўтказилиши лозим бўлган чиқишига кескин қарши чиқишган. Сиёсатчиларнинг таъкидлашича, яҳудий жамоати зич яшайдиган ҳудудда бундай ижрочининг пайдо бўлиши қабул қилиниши мумкин бўлмаган ҳолатдир.
Кампания ташкилотчиларининг маълум қилишича, Юлдуз Усмоновага аввалроқ оммавий равишда қилган антисемитик чиқишларини инкор этиш ва узр сўраш таклифи берилган. Бироқ хонанда бу таклифни рад этган.
Бунга жавобан, фаоллар АҚШ Давлат котиби Марко Рубио номига расмий хат йўллаб, хонандага берилган барча визаларни қайтариб олиш ва унинг мамлакатга киришини тақиқлашни талаб қилишган.
Сиёсатчиларнинг фикрича, АҚШга кириш ҳуқуқ эмас, балки имтиёздир. Нафрат ва адоватни тарғиб қилувчи шахслар эса бу имтиёздан маҳрум этилиши лозим.
Можаронинг яна бир жиҳати тадбир белгиланган сана билан боғлиқ. Спикерларнинг таъкидлашича, концертнинг нацизм устидан қозонилган ғалаба кунида — нафратга чек қўйилган санада режалаштирилгани вазиятни янада ҳақоратли кўринишга келтиради.
Бугун, 4 май куни Нью-Йорк вақти билан соат 11:00 да Ocean Theater биноси олдида мазкур масалага бағишланган матбуот анжумани ва норозилик акцияси бўлиб ўтади. Унда сиёсатчилар ва жамоатчилик вакиллари хонанданинг чиқишини тўхтатиш бўйича якуний талабларини илгари суришади.
Ҳозирча хонанданинг расмий вакиллари АҚШ сиёсатчиларининг ушбу айбловлари ва талаблари юзасидан муносабат билдиришгани йўқ.
Изоҳлар мавжуд емас