Ўзбекистон, Тошкент - Batafsil.uz. Ўзбекистон миллий терма жамоаси бош мураббийи Фабио Каннаваро Сурия терма жамоаси устидан қозонилган йирик ва ишончли ғалабадан (4:1) сўнг ўзининг ўйин ҳақидаги фикрлари билан ўртоқлашди. Мураббий шогирдларининг қисқа вақт ичида янги тактик тизим ҳамда берилган кўрсатмаларни аъло даражада ўзлаштириб олганидан мамнунлигини билдириб, жамоада соғлом муҳит шаклланаётгани ва у тўғри йўлдан бораётганини алоҳида таъкидлади.
Анжуманда Каннаваро учрашувга тайёргарлик жараёни ва майдондаги интизомга тўхталиб, йигитларга "ўртоқлик ўйини" деган тушунча умуман йўқлигини, ҳар бир баҳсга юқори масъулият, юқори темп ва интенсивлик билан ёндашиш зарурлигини уқтирганини айтиб ўтган. Унинг сўзларига кўра, ташқаридан қараганда ўйин жуда осон кечгандек туюлиши мумкин, аммо бу енгиллик, аввало, футболчиларнинг тўғри ҳаракат қилгани, кўп югургани ва рақибга аниқ прессинг ўтказгани эвазига қўлга киритилган. Аслида Сурия кучли рақиб бўлиб, уларнинг Иордания билан 1:1 ҳисобида жанговар дуранг ўйнагани ҳам бунга яққол мисолдир.
Шунингдек, итальян афсонаси жамоадаги таркиб сиёсати ва тактик қарашларига ҳам аниқлик киритган. Каннаваронинг таъкидлашича, унда "асосий таркиб" ёки "захира ўйинчиси" деган айирмачилик умуман йўқ ва у сифатли ротацияга катта эътибор қаратади. Замоновий футбол вақт ва ҳудуд курашидан иборат эканини эслатган мураббий, тўп рақибда бўлганда унга ўйлашга вақт қолдирмаслик учун майдон ҳудудини торайтириш, тўп ўзимизда бўлганда эса бўш майдонларни максимал кенгайтириш лозимлигини тушунтирган. Жаҳон чемпионати каби йирик мусобақаларда топ-терма жамоаларга қарши айнан агрессив ва ўз вақтида қилинган прессинг ҳал қилувчи ўрин тутади.
Ҳозирда жамоа вакиллари намойиш этаётган ўйиндан ва кўпроқ тўпга эгалик қилиб, футболдан завқ олаётганидан мамнун бўлган бош мураббий олдинда уларни Жанубий Кореяга қарши жуда жиддий ва мураккаб сафар ўйини кутаётганини эслатган. Келгуси Осиё кубоги ҳақида гапирганда эса, у ҳозирданоқ фақат Япония ёки гранд жамоаларни ўйлаб, бошқа рақибларни назардан четда қолдириш тўғри эмаслигини, финалгача етиб бориш учун ҳар бир рақибга қарши бирдек пухта ва профессионал тайёргарлик кўриш шартлигини билдирган.
Изоҳлар мавжуд емас