Ўзбекистон, Тошкент - Batafsil.uz. Португалия терма жамоаси сардори Криштиану Роналду футболчилик фаолиятини якунлаш вақти яқинлашганига ишора қилди. 41 ёшли ҳужумчи келаётган мавсум футболдаги фаолиятининг сўнгги йили бўлиши эҳтимолини айтди.
Роналду Vogue журналига берган интервьюсида "бу футболдаги сўнгги йили бўлиши мумкинлиги" ва фаолиятини ёрқин мерос қолдирган ҳолда якунлашни исташини билдирган.
У 2002 йилда "Спортинг" сафида катталар футболидаги фаолиятини бошлаган. Кейинчалик "Манчестер Юнайтед", "Реал Мадрид", "Ювентус" ва ҳозирги клуби "Ал-Наср" таркибида тўп тепган.
Беш карра "Олтин тўп" соҳиби бўлган Роналду клублар ва Португалия терма жамоаси сафида фаолияти давомида 976 та гол урган. У эркаклар ўртасида терма жамоалар даражасида 146 та гол билан рекордчи ҳисобланади.
Роналду келаётган мавсумда Саудия Арабистонининг "Ал-Наср" клубида ўйнашда давом этади. У фаолиятидаги 1000-голлик маррага яқинлашмоқда.
Футболчилик фаолияти якунланганидан сўнг Роналду саёҳат қилиш, падел ўйнаш ва бошқа машғулотларга кўпроқ вақт ажратишни режалаштираётганини айтган.
Эслатиб ўтамиз, яқинда футболчи узоқ йиллик севгилиси, модель ва инфлюенсер Жоржина Родригес билан Португалияда никоҳдан ўтганди.
Изоҳлар мавжуд емас